Varmar opp til øl-festival

Tidlegare i vinter fekk Catten besøk av øl-nestor Gahr Smith-Gahrsen, eit tiltak som lokka om lag 40 ivrige heimebryggarar.

– Vi har heilt sidan Gahr Smith-Gahrsen var her tenkt på å laga ein del 2 av ølskulen. No når det dreg seg til ølfestivalen på Oseana tenkte vi at det kunne vera ei fin oppvarming til festivalen å køyre ølskulen fredag 17. juni, dagen før festivalen, fortel dagleg leiar Bjarte Andersen.

Med gane for øl

Også denne gangen er det 7Fjell bryggeri som stiller med lærerkreftene og kompetansen.

– Vi har fått med oss Jens Eikeset, som er ein av gründerane bak 7Fjell saman med Gahr Smith-Gahrsen. Han har sidan oppstarten vore sjauar, bryggar, selgjar, konsulent og på tapperiet. Alle prosessane rundt det å brygga øl har han difor særs god kjennskap til, noko han treng i den rolla han har i dag som leiar, eller som han sjølv kallar seg, vaktmeister for bryggeriet.

– I tillegg er han utdanna ølkelner og har i særs utvikla gane for øl, fortel Andersen.

Smak av samarbeid

7Fjell er i heimebryggjerkrinsar vel kjend for å vera eit ope bryggeri som meir enn gjerne delar oppskriftene på øla sine. I tillegg er dei store tilhengarar av å samarbeide med andre bryggeri.

– Til oss er planen at Eikeset tek med seg eit par øl som passar godt no i sommarmånadane. I tillegg skal vi få læra meir om tre øl som dei har brygga i samarbeid med andre bryggeri.

– Lactic Brown Sour Brown Ale har dei laga saman med Austmann, Norwegian Wilderness IPA, eit øl med einer, lyng, gran, furu og einebær har dei kokt i hop saman med Brew By Number og det siste er eit spesialøl dei laga til Bergen Beer & Wiskey-festival i fjor.

– Det er The Stingo, Yorkshire Stingo, som dei laga saman med Amundsen. Den siste blir ei spesiell oppleving, for det finst særs få flasker att av det ølet. I tillegg er det berre eit anna bryggeri i verda som har laga eit tilsvarande øl, nemleg Samuel Smith i England, så vil ølhundane teste dette er det berre å ta turen, avsluttar Bjarte Andersen.