Var i 28. etasje då jordskjelvet ramma Las Vegas

Gunnvor Hernes Leonsen og ektemannen Tom Leonsen har med seg ungane på ferie i jordskjelvramma California. Dei resier saman med familien Lind Norvik, også dei frå Os.

Fredag kveld blei delstaten ramma av eit jordskjelv målt til 7,1 på Ricters skala, det kraftigaste jordskjelvet i California på 25 år.

– Dette merka vi ikkje. Vi sat i bil på veg til Yosemite. Men vi merkte godt skjelvet som kom dagen før, fortel Gunnvor.

Torsdag blei California og Nevada ramma av ei skjelv målt til 6,4.

– Vi hadde ein roleg morgon i 28. etasje på hotellet i Las Vegas då det braka laus.

– Heile bygningen svaia

Familien hadde vore i Grand Canyon dagen før, og slappa av på hotellet på morgonen før dei skulle i bassenget.

– Eg var på badet, Tom låg i senga og såg på TV og ungane sat med kvar sin skjerm. Så byrja vasken og toalettet å rista.

– Også senga rista, så Tom hoppa ut av den og sprang til vindauget. Heile det høge hotellet svaia. Men dei er vel bygd for å tola litt.

Eit litt merkeleg syn

Gunnvor og Tom tok med seg ungane og gjekk ned i resepsjonen. Der kom det fleire gjestar.

– Nokre av dei kom veldig lettkledd, men hadde med seg pute. Det var eit merkeleg syn.

– Men det blei ikkje evakuering, vi fekk lov å gå tilbake til romma våre.

Håper alt er overstått

Turistane frå Os har ikkje merkt noko til etterskjelva.

– Men det var ei litt rar kjensle å køyra gjennom ørkenen nær episenteret, og då vi kom fram og fekk høyra at det hadde vore eit endå større jordskjelv mens vi sat i bilen.

– Ungane har lese seg opp på jordskjelv og synest dette er litt vel spennande.

– I morgon reiser vi til San Francisco. Vi satsar på at jordskorpene har rast frå seg for denne gong.