Ein spennande valkamp fram mot kommunevalet om halvanna år blei for fristande då May-Britt Haringstad Mjøs fekk spørsmål om ho kunne tenkja seg å bli leiar for Os Høgre.
– Eg er gira på at Os Høgre skal få den neste ordføraren.
– Det har eg lyst til å gjera mitt for. Det er no den gøye jobben fram mot valet byrjar, fortel den nyvalde leiaren.
På tide med ei kvinne
Mjøs tek over leiarvervet etter Børge Lunde.
– Eg skal ikkje leggja skjul på at ein anna medverkande årsak var at eg tykte det var på tide med ei kvinne i leiarstolen.
– No har lokalpartiet vore styrt av menn lenge nok, smilar Mjøs.
Starta Unge Høgre
Politisk aktiv har Mjøs vore sidan ho meldte seg inn i partiet i 1989.
– Eg var med å fekk igang Os Unge Høgre og var aktiv der fram til 1991-92.
– Etter det hadde eg forskjellige styreverv før det blei ei pause.
– For tre år sidan fekk eg spørsmålet om eg kunne tenkje meg å stå på lista for Høgre til kommunevalet.
– Det passa bra i høve til resten av livet mitt, så eg takka ja, fortel Mjøs som i dag sit i Råd for menneske med nedsatt funksjonsevne (tidlegare kjend som Råd for funksjonshemma), i styret for Oseana KF og som vararepresentant til Plan- og bygningsutvalet.
Med seg i styret får Mjøs Olav Kvinge som nestleiar og styremedlemma Bjørn Sivertsen, Rolv Tveit, Ståle Skaathun, Marianne Kramer og Emil T. Brimsholm. Varaordførar Marie Bruarøy møter òg på styremøta i eigenskap av gruppeleiar for partiet i kommunestyret.
Vararepresentantar til styret er Kathrine Haugland, Erik Vågen og Audun Rainer Busch Bonnier.