Utvidar startlånsramma

Bergen Kommune meldte torsdag at dei frå 12. september ikkje lenger kunne innvilga startlån til vanskelegstilte og ungdom i etableringsfasen, då ramma var brukt opp og Husbanken ikkje ville utvida ramma.

Dagen før, på onsdag, beslutta formannskapet å innstilla på at Os kommune skulle gå motsett veg og utvida ramma med inntil 10 millioner, slik at ramma for 2013 blir på 30 millioner kroner.

– Det vil sjølvsagt vera med på å dra opp den totale lånegjelda vår, men blir betalt av dei rentene og avdraga låntakarane betaler.

– Startlåna vil ikkje belasta drifta vår direkte, men det er sjølvsagt ein risiko knytt til låna, forklarte ordførar Terje Søviknes (Frp).

Stor auke

I saksutgreiinga fortel rådmannen at kommunen har hatt ein stor auke i søknadsmassen, og har ein avslagsprosent på 22 % av dei søknadane som er handsama til no i år.

– I vår vurdering av søknadane legg vi stor vekt på at når ein nyttar startlån så skal det være til kjøp av rimeleg bustad, skriv rådmannen.

– Alle søknadane blir handsama etterkvart som dei kjem inn. Vi følgjer dei kritera Husbanken har satt, men no er krybba tom, så det er ikkje meir penger å dela ut, supplerte kommunalsjef Nils-Petter Borge i formannskapet.

Ekstra innløysing av lån ved at bustad vert seld eller lån refinansiert har til no vore på ca. 3 millionar kroner.

Kun flytande rente

Kristin Haukeland (Ap) lurte på om det berre var flytande rente på låna, eller om det gjekk ann også å få fastrente-lån.

– Det vil jo gje ei betre forutsigbarheit for låntakarane, argumenterte Haukeland.

– Vanleg praksis har vore flytande rente.

– Vi følgjer Husbanken sine reglar, og det er ingenting som fråtek oss moglegheiten til å gje fastrentelån, men fleire kommunar, som oss, er forsiktige med det grunna risikoen for overkurs, med andre ord at vi må betala meir til husbanken enn det låntakaren har gjort til oss, forklarte økonomisjef Ingrid Karin Kaalaas.

– Kva er renta då, undra Olav Djuve (H).

– Den er den same som vi får frå husbanken, pluss 0,25% til administrasjon, svarte økonomisjefen.

– Då er det ikkje noko stort poeng å ha fastrente, konkluderte Djuve.

Saka skal endeleg avgjerast i kommunestyret 24. september.