Utvida kulturelt skule-tilbod

Oseana Kunst og kultursenter lanserte i oktober 2015 sitt formidlingsprogram – Friskunst. Eit opplegg der elevar i 4., 6., 8. og 10. klasse får møta kunsten gjennom året, både i form av musikalsk og visuell kunst.

No blir på mange måtar tilbodet utvida i og med at Os kommune i tillegg har inngått eit samarbeid med Rikskonsertane sitt skuletilbod. Fram til 2014 var Os ei av to kommunar i Noreg som ikkje hadde inngått eit slik samarbeid.

– Avtalen er gjort mellom kommunen og Rikskonsertane, men det har på mange måter blitt eit tre-partsamarbeid der også vi er med, fortel Berit Steen, arrangementssjef ved Oseana.

Får vitjing av pedagog

Konsertane med Rikskonsertane går føre seg onsdag 11. til fredag 13. november i Oseana sin storsal. Elevane frå 5. - 7. trinnet blir inviterte til konsertane med dei unge framadstormande musikarane Sara Övinge (fiolin) og Natalie Gourman (piano).

– I forkant av konsertane vil vi nytta opplegget vi har frå Friskunst med at Mari Persen, som til vanleg jobbar på kulturskulen, men i dette tilfellet er prosjektengasjert hos oss, vil vitja elevane ute i skulane for å fortelje om den musikken dei skal få høra på konserten.

– Kanskje kan dette bli ein modell som også andre kommunar og kulturhus rundt i landet kan ta etter i samarbeid med Rikskonsertane, seier Steen.

Open konsert

I tillegg til skulekonsertane gjer samarbeidet at dei to artistane også vil helde ein konsert for det ordinære publikummet.

– Övinge og Gourman er to av dei framste unge musikarane vi har i Noreg. Det skal bli veldig kjekt å presentera dei også for det ordinære Oseanapublikummet. Torsdag 12. november vil dei spela den same konserten som dei held for skuleelevane i Griegsamlinga. På programmet står mellomanna Brahms, Grieg, Faure og Wieniawskij, avsluttar Steen.