Usemje om utbygging

Fredag fekk Plan- og bygningsutvalet reguleringsplanen for Midtpunkt/Lundehjørnet til 2. gongs handsaming i utvalet. Planane for utbygginga er etter dialog med mellomanna Statens Vegvesen og Fylkeskommunen endra til ikkje å omfatta parkeringshus på Kyrkjeflaten. I staden vil utbyggar frikjøpa parkeringsplasser i det framtidige P-huset på Osøyro.

Les òg:
Vil bygga 28 leilegheiter
Vil ha gangveg

– Dette er fem etasjar pluss tiltak på sjette plan med takterrasse. Har vi opning for å bygga fem etasjer og takterrasse i sentrum, undra Ingrid Netland (Sp).

– Ja, gjennom ein reguleringsplan så har de det, svara plan- og utviklingssjef Aina Tjosås.

– Det er stygt!

Etter at Netland hadde fått stadfesta at kommunen kunne godkjenna fem etasjar pluss takterrasse tok ho for seg framlegget til reguleringsplan.

– Eg har kikka nøye gjennom forslaget og sett spørsmålsteikn ved estetikken på bygingsmassen.

– Kva slags uttrykk er vi i ferd med å godkjenna?

– Det å bygge inne dei fire husværa i Tønjumgården er ikkje bra. Dessuten er bygget er stygt.

– Eg vil seie nei. Det ser ikkje ut, tordna Netland.

Sakna presentasjon

Netland fekk til ei viss grad støtte frå Terje Sperrevik (TvS).

– Sidan dette er andregongs handsaming, så kunne eg godt tenkt med ein presentasjon frå utbyggarane og dei som har utarbeidd planen.

– Eg er oppteken av parkeringsproblematikken og kunne tenkt meg at det låg ei avtale i botn. Det ville gjort meg meir vennlegstilt til den biten.

– Når det gjeld estetikken, så bør vi kanskje gjera nokre grep før saka skal opp til kommunestyret.

– Vi kunne stramma opp reguleringsføresegnene om vi hadde hatt ein dialog med utbyggar no, kommenterte Sperrevik.

Skal vera glad nokon vil investera

Gustav Bahus (Frp) kjende seg ikkje igjen av Netland si omtale av reguleringsplanen.

– Dette vil vera med på å stelle i stand Midtpunkt, bygget kor Rimi er og Lundehjørnet.

– Eg er like glad for denne oppgraderinga, som den Barongården får. Det vil vera med på å skapa det livet vi er på jakt etter på Øyro.

– Vi skal vera glade for at det finst grunneigarar på Os som er villige til å ta investeringane, meinte Bahus.

Ikkje grunn til hallelujastemning

Det fekk Netland til å reagera.

– Skal vi ha hallelujastemning berre fordi nokon vil gjera noko. Skal vi ikkje ta stilling til korleis ting skal sjå ut, undra Netland skarpt.

– Vi skal vera glade for dei som vil hjelpa til og løfta Øyro. Det er eindel nedslitte bygg på Os.

– Eg tykkjer ikkje dei droppar ned nokre kasser på toppen av det eksisterande slik som enkelte hevdar. Dei har diskutert masse av dei føringane vi la inn i prosjektet.

– Vi sa noko sist om avtrapping og oppmyking av fasadane, det tykkjer eg dei har gjort.

– Når det gjeld det arkitektoniske uttrykket Osøyro skal ha, så er det eit ganske ope spørsmål, svara Bahus.

Manglande styring?

Torill Keys (Ap) hadde allereie foreslått å redusera bygget slik at ein var i tråd med den eksisterande sentrumsplanen.

– Sjølv om ein ikkje reagerar på uttrykket, så skal det passa inn med det vi ønskjer å ta vare på på Osøyro.

– Eg føler at vi ikkje har fått vera med på å styra dette, påpeika Keys.

– Om fleirtalet går inn for dette, så anmodar eg om at vi får ein rask presentasjon, la Sperrevik til.

– Slik eg les sakspapira så er dette berre skisser, eg kunne tenkje meg å sjå korleis dei vil løyse det gamle og det nye.

– Dette bygget er viktig for revitaliseringa av Osøyro og det første ein møter når ein kjem Byvegen, påpeika han.

Usemde om vegen vidare for sentrum

Ståle Skaatun (H) meinte at ein gjennom diskusjonen om både Midtpunkt og Barongården tidlegare i møtet kunne sjå tydelege skilleliner mellom dei politiske partia.

– Møtet i dag framhevar ganske tydeleg at vi ønskjer forskjellig retning i sentrum.

– Eg følger dette er rett veg å gå. For meg er det heilt rett å gå opp nokre etasjer, medan andre vil bevara det gamle.

Høgrepolitikeren sitt utsagn satte på nytt sinna i kok hjå opposisjonspolitikarane.

– Då har du ikkje følgd mykje med i timen. Kven av oss har sagt at vi ikkje vil ha fleire etasjer eller utvikling, repliserte Sperrevik.

– Mener du at det er nokon som ikkje vil ha utvikling på Os.

– Du sa vi ikkje kan meine noko om estetikk, kvifor sit vi her då, om vi ikkje skal meine noko om korleis ting skal sjå ut.

– Er de sikre på at dette er det folk vil ha – ei retroblokk frå 70-talet, tordna Netland.

– Det handlar ikkje om kva ein liker og ikkje liker. Ein kan ha moderne bygg som glir inn i nabolaget, men det må vera tilpassa, svara Keys.

Diskusjonen enda med at Terje Sperrevik ba om at saka blei utsett til neste møte i utvalet for å få ein presentasjon frå utbyggarane. Forslaget falt og reguleringsplanen blei sendt vidare til kommunestyret med høgre og frp sitt fleirtal.

Om kommunestyret fell ned på same avgjer, kan utbyggarane ta til med å detaljteikna bygningane og fremja sjølve byggjesaken.