Unge skodespelarar med lokal førpremiere
Om to veker deltar dei på festivalen DUS i Teaterkjelleren på Den Nationale Scene, torsdag har Os barne- og ungdomsteater premiere i Oseana.
Bildeserie:
Å telle til null av Kristofer Grønskag:
– Det blir ei glede å presentera eit av manusa som er del av det nasjonale konseptet Den unge scenen, DUS. Det er den andre gongen Os barne- og ungdomsteater deltar, fortel Frøydis Flotve, ein av dei som har regien på dei unge skodespelarane frå Os.
DUS dannar eit nettverk som utviklar og fremjar ungdomsteater i Norge gjennom nyskrivne manus og regionale festivalar.
– «Å telle til null» av Kristofer Blindheim Grønskag, er vald av heile 29 ulike grupper over heile landet. Det gjer Grønskag til den desidert mest spelte dramatikaren i Noreg denne våren.
– Ei tekstbombe
– For oss var valet enkelt. Vi er ei gruppe med 14 jenter mellom 13 og 16 år frå Os og Fusa. Teksten er svært god og fangar samtida og kva ungdom er opptatt av på ein strålande måte. «Å telle til null» er ei tekstbombe der vi tel ned frå ti til null, fortel Flotve.
Dei ulike tablåa er tilsynelatande frittståande inntil vi etter kvart forstår at dei alle grip inn i kvarandre og heng saman på ulike vis.
– Alt handlar om det desperate ønsket om å bli sett. Er det lov å ikkje vere konstant glad i lykketyranniet? Tør du vise kven du eigentleg er? Kva er ekte og kva skjer eigentleg når du får nok, når du har talt til null?
Premiere er i Oseana torsdag 9. mars frå kl 18.30. Stykket varer i om lag 55 minutt.
Skodespelarar: Una Berntsen Seland, Frida Mjøs Johannessen, Marie F. Steinum, Natasja Smørholm, Maria Dahl, Kaja Lyssand Nymoen, , Karina Kårvatn Lekven, Maren Lunde Petersen, Lilly-Mae Grønvigh, Isabell Renee Aase, Kristina Dale, Zofia Konieczka, Anne-Mathilde Tillung og Elida Haugen Kordts.
Regi: Frøydis Flotve og Veronika Flotve Røssland
Teknisk hjelp: Jon Eirik Sira
I Bergen om to veker
DUS Regionfestival blir arrangert på Den Nationale Scene, Teaterkjelleren 16-18. mars.
– Framsyninga vår skal visast på DNS, laurdag 18. mars klokka 15.00.
Ei av dei fem deltakande gruppene kan bli valt ut til å reise til Oslo og vise framsyninga si på den nasjonale festivalen på Det Norske Teateret i mai.