Ung Lørdag tar form

Laurdag 18. april opnar ungdomsklubben Ung Lørdag (UL) dørene i gymsalen til Os barneskule.

Klubben har vore under planlegging gjennom vinteren, og i februar gjekk initiativtakarane ut med informasjon om namnekonkurranse.

– Vi fekk inn mange gode forslag og landa på eit som kom frå ein internt i gruppa, Thomas André Dahl, fortel politibetjent og medlem i arrangørgruppa, Anne Lyssand.

Ein annan av ungdomane i styret, Anna Størksen Parnefält, fekk ei venninne på skulen, Rikke Løvaas, til å teikna logoen.

Natteravner, transport og frivillige vaktar

Ung Lørdag bruker gymnastikksalen til Os barneskule som klubblokale. Grunna grunnlovsfeiring og langhelg blir det ikkje klubb 16. eller 23. mai, men elles er det aktivitet i gymsalen kvar laurdag frå opningsfesten 18. april til og med siste klubbkveld før sommarferien, 6. juni.

Klubben gjeld for ungdom i heile kommunen og det blir ordna med heimtransport til krinsane når klubben stenger. Foreldreutvalet ved Os ungdomsskule har engasjert seg for å skaffa frivillige vaksne til å vera med som vakt heile eller delar av ein eller fleire klubbkveldar.

– Det er rundt 450 elevar på skulen, men av rundt 900 foreldre er det førebels berre 10 som har meldt seg. Vi har vaktar til dei to første klubbkveldane, men eg håper og reknar med at fleire melder seg, seier FAU-leiar Veronika Wilhelsen.

Natteravnene i Os vil tilpassa vaktene sine sånn at dei har ravner ute rundt skulen og i sentrum mens klubben er open og etter stengetid.

Sport, dans, servering og avslapping

Den doble gymsalen har skiljevegg og arrangørane vil dela inn salen så det blir ein arena for både sport, dans og musikk, servering og «chilling» i sitjegrupper eller på matter, i salen og på scenen.

Det blir også lagt opp til spel som bordtennis og playstation. Om det blir gratis wifi i salen til opningsfesten er førebels uklart.

Kiosk blir i tilknyting til kjøkkenet med opning inn mot gymsalen.

– Vi held på å sjå på dette med inndeling, at vi unngår ballspel nær musikkanlegget, og andre praktiske omsyn vi må ta, seier eldsjel og initiativtakar Øyvind Hægland.

Førebur opningsfest

Ungdomane i styret fortel om positiv interesse for Ung Lørdag blant medelevar.

– Det har vore ein del spørsmål om kor tid vi kjem i gang og kva klubben skal innehalda, fortel Sigve Søfteland og Christoffer Søfteland frå Os vgs.

Nils Midtseter stiller opp med lydanlegg til opningsfesten og nokre av ungdomane går med planar om å laga ein opningsfilm. Måndag før påske var dei i manusmøte med kunstnar, forfattar og tidlegare filmfestivalarrangør Vidar Bratlund Mæland i Solbakkestova.

– Dei trur dei har det travelt, men eg har vore med på meir hektiske produksjonar enn dette, humrar Vidar, som med tøysedansebandet Frode Vidars i 2008 gjekk frå ein vill idé til ferdigprodusert singel på fire dagar.

Om det blir ferdig manus og fullført videoproduksjon i innspurten til opningsfesten for Ung Lørdag gjenstår å sjå.