Under vatn i sone 2 i Oselvo
VIDEO: Natt til fredag opnar fisket i ei nesten uttørka elv. Kva meiner fiskarane og korleis ser det ut i den mest attraktive kulpen?
Bildeserie:
Årets sesong i Oselvo startar, som vanleg dei siste åra, 15. juni. Denne gong etter ein periode der 26 av dei 28 siste dagane har vore utan nedbør.
– Det har sett verre ut, for to år sidan var vasstanden berre 0,18. Etter den vesle regnskuren i natt har vasstanden faktisk auka frå 0,32 til 0,33 kubikk i timen på målaren på Røykenes, seier Stig Gram-Knudsen og ler.
– Men det er langt frå optimale forhold. Heldigvis ser det ut til å koma ganske mykje nedbør, oppmot 50 mm til saman torsdag og fredag. Då treng det ikkje gå så mange dagar før forholda er fine.
Gram-Knudsen er nyvalt leiar i fiskeutvalet i Os Jakt- og Fiskelag, som via UT.no sel fiskekort i Oselvo.
Har sett noko fisk
Remi Bårdtveit, som den tørre sommaren 2016 fekk årets «Oskar» (første laks tatt av medlem i fiskelaget) 12 dagar etter at fisket opna, har plan om å fiska opningsnatta.
Både han og Stig reknar med at det kan bli fangst i sone 2.
– Det skal vera tre fiskar i sone 2, seier Remi, som sjølv har kort lengre oppe, i sone 5, opningsnatta.
I dag har han og Stig vore og rydda på dugnad langs Kremretten.
– Der såg vi tre fisk, ein av dei var ganske stor, 3-5 kilo, så også her kan det bli tatt laks tidleg i sesongen, seier Gram-Knudsen.
– Kan snart bli meir liv
Fredag, ei veke før opning, var Midtsiden med kamera over og under vatn i sone 2.
Videoen, med to fiskar som ser ut til å vera store nok til å bita på ein krok, ser du i ruta over.
– Kan all badinga som har vore i den varme elva få konsekvensar for fisket?
– Så lenge det ikkje er bading rett før fisket startar, og det er vel litt mindre innbydande no når det har blitt kaldare på land, så trur eg ikkje det har noko å seia.
Då Remi fekk «Oskar» i 2016 «kokte» det med laks i elva, fisk som hadde stått i hamna og venta på betre vassføring.
– Har de inntrykk av at det står mykje fisk og ventar på å gå opp, at webkamera under vatn i Os hamn blir hyppig besøkt?
– Det står nok ein del fisk lengre ute no når vassføringa er så dårleg. Når regnet no kjem så vil det nok bli meir liv både i elva og framfor kameraet til Os Gjestehamn.
• Midtsiden samleside: Jakt og fiske