UKM i gang
Bilder: Fylkesmønstringa av Ungdommen si kulturmønstring er i gang i Oseana. Film, litteratur, dans, teater, musikk av ymse slag står på programmet laurdag og sundag.
For 21. gong arrangerast fylkesmønstringa i UKM. For første gong i Oseana Kunst- og kultursenter.
– Det er ei glede å ønskje dykk velkomen til Os og Oseana.
– Oseana skal skape ei verd av inspirasjon, eg håper deltakinga her kan gje dykk inspirasjon til å halda fram med kunsten og at de får ei god oppleving på Os, helsa ordførar Terje Søviknes (Frp) då han sto for den offisielle opninga av arrangementet.
300 deltakarar på to dager
Astrid Martinussen, primus motor for UKM i Hordaland, fortalde at omlag 300 deltakarar skal i sving i løpet av helga.
– Nokre av de er så heldige at de blir plukka ut til å vera med på landsmønstringa i Larvik i juni.
– Eg må nytte høve til å takka alle medhjelparane mine rundt i kommunane som har stått for UKM lokalt, og som har sørga for at de har kome hit, helsa Martinussen.
I løpet av UKM sine 21 år, har Martinussen sett omlag 1200 talentfulle ungdommar utfolda seg i fylkesmønstringa.
På nettet
Oseanadirektør Ole Tobias Lindeberg gler seg over å fylla huset med talentfulle ungdom.
– Det er utruleg kjekt å husa eit slik arrangement.
– Eg håpar mange osingar tek turen innom i løpet av helga for å få med seg nokre av innslaga.
– Om ikkje, så sender vi frå arrangementet på ukm.no/hordaland etter at innslaga har vore, så der er det berre å gå inn, smiler direktøren.