Tussakøyrde til Hatvik
Vinglete køyring, risikofylt forbikøyring og høg fart med punktert dekk gav bot og ni månader utan førarkort.
Ein mann i 30-åra, busett i Bergen, blei i januar dømd i Nordhordland Tingrett for brot på Vegtrafikkloven sine bestemmelser om aktpågivande køyring.
Mannen skulle møta ein annan på Os etter arbeidstid ein dag i august i fjor. For å korte ned ventetida fann han ut at han skulle ta seg ein tur til Hatvik, sjølv om han allereie hadde punktert på venstre bakhjul.
Køyrde på felgen
Allereie etter eit par tre kilometer vrengte det punkterte hjulet seg og resten av turen fram og tilbake mellom fergekaia på Hatvik og Osøyro gjekk på felgen.
Då politiet traff mannen på ein bensinstasjon i Os sentrum var han i ferd med å legga på reseverhjul. Politiet tok beslag i førarkortet hans og gav han eit forelegg på 6000 kroner som han ikkje aksepterte.
Fem vitner blei ført for retten, mellom anna ei kvinne som blei forbikøyrd av mannen, ein lastebilsjåfør som blei tatt igjen av han og ein bilførar som låg bak han heile vegen frå Osøyro til Hatvik.
Vinglete køyring
Retten legg i si vurdering vekt forklaringa frå desse vitna:
«Det sentrale er totalbedømmelsen av kjøreturen, spesielt mot Hatvik fergekai, men det er flere sider som er brudd isolert sett også, som for høy hastighet etter forholdene, markert farepotensiale ved selve manøvreringen av bilen ved at han ikke tok hensyn til den reduserte kjøreegenskapen og andre moment, som avstand til forankjørende, oversikt før forbikjøring osv.»
«Tiltalte selv mener at det ikke var slike forhold, men retten kan vanskelig tolke bevisene på annen måte enn at aktsomhetsnormen er overskredet.»
Vitna fortalde i retten om vinglete køyring og høg hastighet i forbikøyringa då dekket vrengte seg. Lastebilsjåføren fortel at han hadde observert køyringa i spegelen og at han på ein allereie smal vegstrekning la seg inn mot midten for å hidra ytterlegere forbikøyring, noko som gjorde at tiltalte holdt for kort avstand til lastebilen.
Retten meiner mannen var klar over kva som skjedde og at han tok bevisste sjansar.
Mannen blei dømd til ei bot på 7500 kroner, saksomkostningar på 1500 kroner og tap av førarkortet i ni månader. I tillegg må han avlegga ny praktisk førarprøve før han får att førarretten.