Trynte 'an mot Årstad

Handballdamene til Os turn har eit tett kampprogram om dagen. Laurdag spelte dei uavgjort 25-25 mot Kjøkkelvik. Måndag var det Årstad som var motstander i Haukelandshallen.

– Vi startar utruleg bra og speler noko av det beste vi har gjort dei første 45 minutta.

– I første omgangen held vi oss til avtalene, står godt i forsvar og gjer det vi snakka om i garderoben, fortel Erlend Lyssand.

God start

Andre omgangen startar som første omgangen med eit godt Osforsvar.

– Vi held fram med å rykka ifrå og spelar god handball også i starten av andre omgang, men samstundes vi har eindel sjanser vi ikkje tek vare på.

– Omlag halvveis leiar vi 21-13, seier Lyssand.

– Skulle tatt timeout

Så byrjar det å gå i stå for Osdamene.

– Det vi frykta skjer. Årstad får spele lange angrep og vi blir ståande bak der.

– Når vi kjem fram i angrep tek vi kjappe avslutningar som vi ikkje treff på, samstundes med at Årstad legg om spelet sitt.

– Årstad er gode når dei får teften. Eg burde ha tatt ein timeout og fått lagt om spelet vårt. Det tek eg kritikk på, men samstundes må jentene vera med på å ta litt kritikk på at dei ikkje omset sjansane til mål. Vi hadde dei, avsluttar Lyssand.

Kampen blei avgjort med straffe til Årstad i siste sekund etter at Madeleine Hjertnes fekk direkte raudt kort. Dette betyr at ho må stå over mot Kjøkkelvik heime i Oshallen komande laurdag.

Årstad-Os 26-25 (10-14)
Utv: Årstad 2x2 min, Os 2x2 min + eitt direkte raudt kort
Os sitt lag: Madeleine Hjertnes (2), Silje Martine Årseth (4), Emilie Hjertnes (7), Maria Stangeland Lunde (1), Hilde Kristine Røttingen (1), Line Hjelle Berentsen (4), Vibeke Ingebrigtsen, Elise Hjelle (3), Vilde Fyllingen (1), Hanne Sørstrønen, Marte Øvreeide (2)