Trur på høg folkevekst i Bjørnafjorden

Folketalet vil krympa i 40 prosent av kommunane fram mot 2050, skriv SSB i dag.

Byane og områda rundt vil halda fram med å veksa, mens veldig mange distriktskommunar vil sjå redusert innbyggartal dei neste tiåra.

– Desse kommunane vil få særleg høg snittalder, skriv SSB.

SSB si nye befolkingsframskriving viser at folketalet i Noreg vil veksa frå dagens 5,4 millionar menneske til 6 millionar i 2050 og 6,2 millionar i 2100.

I Bjørnafjorden kommune reknar SSB med at vi aukar frå 25.213 innbyggarar i 2022 til 30.030 innbyggarar i 2050.

• Sjå kommune for kommune i kart

Låg vekst i Vestland

I sitt hovudalternativ i befolkingsframskriving reknar SSB med at folketalet i Vestland fylke vil auka med 8,2 prosent frå 2022 til 2050, altså frå 641.292 til 694.074 innbyggarar.

SSB reknar med at folketalet vil veksa meir i 6 av dei 10 andre fylka, med Viken på topp med 18,5 prosent vekst og Nordland på botnen med 1,6 prosent nedgang i folketalet dei neste 28 åra.