Trond Tøsdal held seg i toppen
Etter ein god debut på Rudskogen var Tøsdal to gongar på pallen på Arctic Circle Raceway.
Bildeserie:
Trond Tøsdal frå Os MC & MX-klubb kom på 2. plass i debuten i roadracing (juniorsport 300) på forsommaren.
I helga køyrde han noregscuprunde nummer 3 og 4 på Arctic Circle Raceway utanfor Mo i Rana.
Der landa han på 3. og 2. plass.
– Dette er eg veldig nøgd med! Den eine dagen var eg dessutan på 3. plass om vi tar med klassen over, supersport 300, som køyrer med raskare syklar, seier Trond.
Samanlagt, etter å ha køyrd 3 av 4 NC-rundar, ligg han på 2. plass.
– Innbyr til høgare fart
Arctic Circle Raceway er ikkje berre nasjonalanlegget for roadracing, banen er lengre enn Rudskogen (3.753 meter vs 3.254 meter) og innbyr ifølgje Tøsdal til høgare fart.
– Med syklane i våre klassar kan du halda toppfart gjennom alle dei tre første svingane. Her handlar det om å få ein god start, og om å våga å venta med å bremsa, forklarer Trond.
– Sjølv om det var færre deltakarar med her i nord, så var det fleire flinke å bryna seg på.
Eirik Tråsevik (Solør MSK), som leiar i samandraget, hamna på 3. og 4. plass. Martin Manussen (Hennes MSK), som ikkje deltok i dei to første rundane på Rudskogen, vann begge dagane i Mo i Rana, og ligg på 3. plass samanlagt.
Reiser direkte til Sverige
NC-rundane gjekk fredag og laurdag. Søndag var det fri, frå måndag til torsdag har Trond deltatt på pappa Frank og samarbeidspartnarane sitt kjøreutviklingskurs «Baneviken» på same bane.
No går turen sørover igjen, men ikkje heim til Os.
– Vi køyrer direkte til Sverige for litt ferie før NC-runde 5 og 6, som går i svenske Karlskoga, fortel Trond.