Trippel Os-siger i NM
VIDEO: Sundag blei junior-NM i RC Buggy bilar arrangert på Nore Neset. Osingane Sindre Johannessen, Lars Henrik Fauske og Andreas Johannessen tapetserte pallen etter ei jamn A-finale.
Bergen og Omland Modellbil klubb (BOMBK) arrangerte i helga junior NM og Noregscup-finalar på den nybygde modellbil-banen på Nore Neset.
– Det har vore ein intens dugnadsinnsats frå Osavdelinga i BOMBK i sommar. Banen blei såvidt klar til junior-NM og det har nok vore meir snikring enn trening for dei fleste i klubben den seinaste tida, fortel Jostein Helland.
SJÅ VIDEO FRÅ NM NEDST I ARTIKKELEN
– Vi er ikkje lite stolte av at vi klarte å få banen ferdig på såpass kort tid og med mykje dugnadsinnsats. Vi må òg få takka Nore Neset IL som har latt oss laga bane ved sidan av deira bane.
Trippel Os i NM
Arrangementet gjekk over to dagar, laurdag og sundag, med junior-NM som avslutting og det store høgdepunktet.
– Det blei ein thriller av ein A-finale med solid representasjon frå Os.
– Tilslutt blei det reint Osmeisterskap kor Sindre Johannessen blei noregsmeister etter ein jamn fight med Lars Henrik Fauske (sølv) og bror Andreas Johannessen (bronse).
Tre i A-finale
Meisterskapet starta med Noregscup i 2wd Buggy og Short Course laurdagen.
I den største klassa, 2wd Buggy, gjekk Claus Didriksen frå Bergen av med sigeren etter glimrande køyring i dei to siste finalane.
– Fleire osingar gjorde det òg bra. Sindre Johannesen, Lars Henrik Fauske og eg sjølv kom oss alle blant dei ti som fekk køyra A-finalen, fortel Helland.
– I Short Course køyrde osingane Benjamin Nagelsen-Balland og Daniel Solberg bra og enda på 5. og 10. plass i A-finalen.
– Martin Bergsvåg søgja for enno ein pokal til Os då han vann b-finalen, seier Helland.
Vinnar av A-finalen blei Richard Salomonsen frå Bergen.
Sundagen blei det før NM-finalen arrangert Norecup i 4wd Buggy, denne blei vunnen av Roy Gjemble frå Innherred i suveren stil. Einaste osing i finalen var Benjamin Nagelsen-Balland.