Trente karate på fotballskule
Ein meir enn fullbooka Rema 1000 Pre Camp skal innom fleire idrettar før skulestart.
Bildeserie:
Måndag morgon starta årets Rema 1000 Pre Camp på Kuventræ. Fotballspelarar i alderen 4. til 8. klasse, frå alle klubbane i kommunen, var inviterte til tre dagar med aktivitet før skulestart, og 60 plassar blei for lite.
– Det er ikkje kjekt å seia nei til nokon. Vi auka kapasiteten litt, så vi fekk plass til 74, seier dagleg leiar i Os Fotball, Endre Brenne.
Tanken er å få blodsirkulasjonen i gang igjen etter ferien, og før serien og dei første cupane startar, men i år er det ikkje berre trening med ball.
Inspirasjon og koordinasjon
Precampen varer frå klokka 9 til 15 desse tre dagane før skulen startar.
– For at det ikkje berre skal handla om fotball så har vi henta inn nokre eksterne idrettsinstruktørar. Eg trur spelarane både kan læra noko og få inspirasjon av å prøva noko heilt nytt.
Tysdag kjem Brenne sin kamerat Jonathan Varela Byrkjenes frå Norna-Salhus til Os for å læra frå seg løpsteknikk og måla fart på 10- og 40 meter med laser, onsdag blir det kanskje yoga. Dagens fotballskule handla om karate.
Like smidig som Zlatan?
Brenne er spesielt nøgd med at han har fått Os Karateklubb til å koma med gjesteinstruktørar, og det var hovudinstruktøren sjølv, Noregs høgast graderte sensei Cato Bruarøy, med dottera Carmen, som stilte på Kuventræ i dag.
– Kampsport er veldig bra saman med fotball. Vår eigen Hassan El Fakiri trente bryting for å bli ein betre fotballspelar, fortel Brenne.
Bruarøy gjennomførte både oppvarmingsøvingar, fotarbeid, lette sparringøvingar og nokre enkle knep.
– Det er bra for alle idrettar å prøva koordinasjonsøvingar frå andre idrettar. Når du blir tvungen til å bruka kroppen på ein ny måte så lærer du noko nytt. Det kan gje betre balanse, betre timing og betre teknikk, seier karateinstruktøren.
– Spesielt ungar i barneskulealder bør prøva fleire idrettar for å bli skikkeleg god i éin eller to. Som Zlatan, som har svart belte i taekwon-do.
• Les òg: Zlatan sin fysikk får trenarar over heile verda til å klø seg i hovudet (NRK)