– Treng ikkje føle seg utrygge

Natt til fredag fekk politiet melding om hærverk på fleire bygningar i Halhjemsmarka. Ein person blei gripen i løpet av natta.

– Det er ikkje heilt rett at det blei gjort hærverk på fleire bygningar. Det var kun ei adresse som angripen, men det blei gjort hærverk på fleire bilar og postkassestativ. Den gripne hadde ein relasjon til den aktuelle adressa, fortel etterforskingsleiar Kenneth Rastad ved Os lensmannskontor.

Rastad understreker at andre i området ikkje har grunn til å føle seg utrygge.

– Men vi ønskjer at folk tar kontakt om dei fekk skadeverk på eigedeler natt til fredag. Vi ser desse tinga i samanheng, forklarar Rastad.

Knakk armen

Mannen som blei gripen satt i arresten natt til i går og fleire timer i avhøyr saman med advokaten sin fredag.

I tillegg til skadeverket han har utført skal han ha utøvd vald mot ein person på den aktuelle adressa.

– Den fornærma i saka fekk knekt eit bein i armen. Vedkommande er ikkje kritisk skadd, men har fått fysiske skader og har blitt behandla av lege.

Omfattande avhøyr

Det var fleire personar på adressa då den gripne kom der natt til fredag.

– Dei opplevde det som alvorleg trugslar frå mannen.

– Desse har vi også hatt inne til avhøyr i går. Det er eit omfattande etterforskingsarbeid, noko som blant anna gjorde at vi ikkje hadde kapasitet i går ettermiddag til å vera tilstades ute på Halhjem ferjekai for å overvaka trafikken, fortel Rastad.

Blir vurdert for varetektsfengsling

Rastad fortel at etterforskinga held fram også laurdag.

– Det vil bli nye avhøyr i dag. Den gripne sit framleis i arresten og vi vil vurdera om han skal framstillast for varetektsfengsling eller om det er andre alternativer til oppfølging, mellom anna i forhold til rusproblema hans. Det som er sikkert er at han ikkje slepp ut utan nokre former for restriksjoner.

– Vi ser svært alvorleg på saka, understreker Rastad.

Mannen skal ha vore gripen fleire gonger det siste året, men ikkje for tilsvarande saker som dette.