Treng du nokon å leika med?
Ein benk med ei litt spesiell rolle blir i desse dagar montert ved Søre Øyane barneskule.
Bildeserie:
Måla i regnbogens fargar står benken sentralt plassert på uteområdet til Søre Øyane barneskule.
– Det er ein vennebenk, eller buddybench som den blir kalla i andre land, forklarar Rebekka B. Hamilton, klassekontakt for 7. trinn.
Det var ho som kom over ein link til ein NRK-sak om Berg barneskole i Trondheim der dei hadde montert ein slik benk.
– Her kan born finna nokon å leika med, nye vener eller rett og slett bli mindre einsame.
Tanken er at om nokon set seg på benken så skal dei andre borna reagere og gå bort og spørre om dei vil vera med i leik.
– Eg håper det blir ein positiv ting for elevane og skulen.
Møbelsnikkar tente på ideen
Rebekka blei inspirert og kontakta resten av FAU, skuleleiinga og elevrådet som óg tente på ideen.
Dei jobba ei stund med å finna nokon som ville hjelpa dei med prosjektet, men då dei kontakta Per Atle Moldeklev frå Moldeklev AS hadde dei møtt på rette mannen.
– Per Atle blei så engasjert og tilbydde seg å gjera jobben for oss gratis, vi måtte berre betala for materialet.
Per Atle arbeida som prosjektleiar hos ABB i mange år før han i oktober i fjor gjorde hobbyen med å laga møblar om til jobb. No produserer han blant anna bord og benkar - det kundane ber han om å laga.
– Eg la ut ei annonse på Finn.no då eg starta opp, men den måtta eg fjerna for det blei rett og slett for travelt for meg.
– Men då eg blei kontakta angåande dette prosjektet så måtte eg bli med. Som 5-borns pappa så er eg ganske engasjert mot mobbing og born si oppvekst.
Vennebenken er no på plass, det manglar berre eit fundament som skal støypast rundt.
– Målet er at ingen skal bruka benken
Ein annan som har vore veldig innvolvert i prosessen er elevrådsformann, Isak Hamilton. Han har vore med heilt frå starten og elevrådet har vore med på både design- og fagevalet.
– Eg har jo lyst til at så få som mulig skal bruka benken, men ser vi at nokon sit her så skal vi få dei med oss. Har nokon sete her i 10 minutta så er det for gale, det skal ikkje skje, fortel den engasjerte eleven.
Rektor Gunhild Hansen er imponert over arbeidet elevrådet har lagt ned i vennebenk-prosjektet.
– Det er heilt fantastisk! Elevrådet har gleda seg veldig til å få den på plass, og den blei veldig fin. Eg trur nok at mange har lyst til å prøva benken i starten, dei var heilt ville her ute når den kom. Men målet er jo at den ikkje skal bli brukt, fortel Hansen.