Tre rekordløp i VM

Sverre Lunde Pedersen gjorde det godt i allround-VM for seniorar i Calgary i helga.

Laurdag slo han først sin eigne personlege rekord på 500 meter med nesten halvtanna sekund, frå 37,17 til 36,56. Det var godt nok til 15. plass på distansen.

Same dag slo han rekorden sin på 5000 meter, den gamle rekorden var på 6.29, 65, den nye er på 6.22,83, noko som gav 12. plass på distansen.

- Det er naturleg at det blir nye rekordar på denne isen, som er ein del raskare enn det vi har å gå på i Europa, seier Sverre til Midtsiden.no.

I fjor sette han ny rekord på 1500-meteren på den same isen. I går slo han rekorden på 1.47,53 med tida 1.45,48.

- Eg er nøgd med alle løpa mine, men 1500-meteren gjekk noko raskare enn venta, så den heng nok høgast.

Trass i tre gode løp er han litt skuffa for at han ikkje klarte å kvalifisera seg til å gå 10.000-meteren. Han var nemleg berre 17 hundredelar frå å hamna blant dei 12 beste, som får gå lengste distanse.

- Hadde eg fått gå så kunne eg nok betra rekorden min med halvtanna minutt, trur han.

- Samstundes var det kanskje like greit, med tanke på junior-VM om knappe to veker, seier Sverre, som i kveld reiser heim til Noreg for å lada opp til årets høgdepunkt.

Dette er nest siste sjanse til å bli juniorverdsmeister. I fjor blei det sølv.

VM går i Finland og startar 25. februar. Sverre reiser austover tysdag om ei veke.