Tre av ti elevar frå Os

Bildeserie:

Full skjerm

1 av 2

Av dei 230 ordinære elevane ved Fusa vidaregåande er kring 70 av dei frå Os, om lag tre av ti. Torsdag heldt skulen open kveld for å nye elevar og føresette eit innblikk i kva skulen i Eikelandsosen har å by på.

– Vi har mange osingar her, og dei er gjerne særleg interresserte i TAF-løpa våre, seier rektor Tor Johannes Hjertnes.

Både rektor, lærearar og elevar er tromma ut for å informera om studiemoglegheitene og miljøet ved skulen denne kvelden.

–Vi konkurrerar på ein måte med Os vidaregåande og Os gymnas om dei same elevane, men samstundes konkurrerar vi ikkje, om du forstår?, seier assisterande rektor Hildegunn Andersen som viser Midtsiden rundt.

Underteikna møtte fleire osingar som var på mysetur i Fusa, og gjennomgangstonen hos dei ein snakka med er at dei har eit veldig godt inntrykk av skulen.

Populært TAF

– Elevane våre frå Os er her stort sett i studieløp dei ikkje får tilbod om på Os. Vi har TAF både innan helse, marin, og mekanisk.

– TAF-modellen er eit fireårig løp der elevane sit att med både fagbrev og studiekompetanse med fordjupning i realfaga matematikk, fysikk og kjemi. Dei første to åra har ein status som elev, og dei to siste som lærling med lærekontrakt.

For å verta TAF-elev er det ein litt annan prosess enn ved «vanleg» vidaregåande utdanning.

Ein må senda eigen søknad til skulen, og gjennom intervju i læreverksemdene. Til sjuande og sist vert opptaket gjort av bedriftene på bakgrunn av karakterar og intervju.

Blant dei beste i Hordaland

Restaurant og matfag i Fusa ligg heilt i toppen og hevdar seg i Hordacupen, ei konkurranse mellom skulane som har restaurant og matfag, kvart år.

– Vi kjem alltid heim med ein pokal for eit eller anna. Elevane våre har fått smaken på å gjera det godt, og gode resultat i Hordacupen løftar elevane våre slik at dei får ein «boost» av sjølvtillit før eksamen. Dei gjer det alltid bra der også.

– Vi er veldig opptekne av at vi skal vera godt utstyrt, og kjøkkenet vårt er nettopp det. Vi ynskjer at elevane våre skal kjenna dei maskinene som dei vil treffa ute i arbeidslivet. Vi ligg faktisk litt framom ein del restaurantkjøkken utstyrsmessig.

– I tillegg blir elevane våre vande med å stå tidleg opp og å stå på for å komma seg på skulen. Det at dei viser denne evna tel mykje for verksemdene når dei skal vurdera lærlingane.

– Høgt nivå

I samband med open kveld-arrangementet har vg1 elevane på restaurant og matfag, til liks med mange andre elevar, flytta arbeidsøkta si til ettermiddag og kveld. Osingane Khempon Hemrach og Sivert Fonn Fjæreide er i full sving på kjøkkenet.

– Eg enda opp her i Fusa fordi eg hadde lyst til å jobba med mat. Då var det enten her eller Sandsli som var aktuelt. Fusa er kortare reiseveg, og det er veldig høgt nivå her, seier Sivert.

Khempon seier seg einig, og angrar ikkje på det valet ho gjorde då ho byrja på Fusa vgs i fjor haust.

– Det er veldig godt miljø, både på skulen og på studiet, så vi trivst veldig, seier dei to før grytene kallar dei attende til arbeidet.

Den nye olja

Naturbruk er også ei populær retning i Fusa. Der lærer ein mellom anna om samanhengar mellom biologisk produksjon i oppdrettsanlegg, tålegrensene i naturen, bruk av naturressursar og menneskeleg aktivitet.

– Vi har vg2 Akvakultur her hos oss, og i tillegg TAF Marin, som er svært populært. Det gjev eit veldig godt grunnlag for å søkja høgare utdanning innan akvakultur, biologi og realfag. Det vert sagt at marine næringar er den nye «olja» vår, og søkjarmassen er god. Dette studieløpet utnyttar den flotte naturen i Fusa, og er ofte på utflukter i nærmiljøet.

Estetikk i fokus

Tidlegare formgjevingsfag, som no heiter kunst, design og arkitektur, har også bidrege til heider og ære til skulen.

– Elevar herifrå har fått arbeidet sitt på katalogar og vunne prisar ved fleire høve. Denne linja er i utgangspunktet studiespesialisering med formgjeving og kunstfag. Det munnar ut i studiekompetanse etter tre år, men i tillegg er det ti timar med kreative fag i veka. På vg2 og vg3 har ein i tillegg valfag der ein kan velgja mellom ei rekkje teoretiske, eller formgjevingsfag.

Godt miljø i alle endar

Andersen seier at det sosiale miljøet på skulen er veldig bra.

– Her har vi tilreisande elevar frå både Os, Samnanger, Kvam og Kvinnherrad, nokre bur på hybel, medan andre har tidlege morgonar og pendlar mellom heim og skule kvar dag. Hos oss får alle elevane gratis frukost kvar dag. Det er ei etter måten lita investering for å gje ungdomane ein god start på dagen. Det bidreg også til det sosiale miljøet sjølvsagt.

– Elles må eg få skryta litt av lærargruppa her. Vi har eit kjempegodt kollegialt miljø, og det trur eg smittar over på elevane. Og vi bryr oss veldig om ungdomane våre. Og vi har fantastiske tilsette i alle endar. Vi har kjempeflinke lærarar som pendlar frå Bergen og inn her kvar dag, fordi det er her dei vil vera. Det tykkjer eg borgar bra for denne skulen, avsluttar Andersen.