Tre år ved dammen

Knut-Inge Johnsen tok rundt 1500 bilde frå kontorvindauget sitt då han frå 2008 til 2010, og frå 2011 til 2012, jobba som ungdomsarbeidar ved Os kyrkjelyd.

Les òg: Konfirmantane har knipsa

No blir det utandørs fotoutstilling med 120 av bilda, hengande i snor mellom trea på Kyrkjeflaten.

– Utstillinga opnar måndag klokka 12. Eg kjem til å vera ved utstillinga utover dagen, seier fotografen.

Bilda er også utstilt tysdag og onsdag.

– Starta som venstrehandsarbeid

Knut-Inge, som jobbar som lærar i film og foto ved Fana Folkehøgskole, har blitt oppfordraav andre til å stilla ut den noko spesielle bildeserien han sit på.

– Eg hadde ofte gardinene trekt for, så ikkje du skulle koma for mykje lys på dataskjermen. Men så la eg jo merke til kor fin Kyrkjeflaten er, og etterkvart kor mange små episodar som skjer frå dag til dag.

– Det starta som litt venstrehandsarbeid, med eit eldre analog kamera, der eg tok bilde i ulikt vêr og av ulike episodar. Og så blei det med tida ei ganske omfattande mappe.

Ingen paparazzi

Johnsen presiserer at han har vore opptatt av å ikkje vera noko paparazzi.

– Alle bilda er tatt utan teleobjektiv, eg ville berre fanga situasjonar, ingen skal vera enkle å identifisera.

– Men ein del av dei som er på bilda vil nok kjenna seg sjølv eller kameratane sine igjen.

Fiske (!) og vannkrig

I bildeserien er alt frå ungar som vassar og ei dame som går på tur med ein hund som strir imot, til ungdomar i vill vannkrig og ein gut som fiskar (!) i dammen.

Vindauget som bilda er tatt frå er i dag innesperra av eit tilbygg som er under bygging.

Nokre av dei 120 bilda som skal stillast ut på måndag kan du sjå i ein bildeserie på denne nettsida.

– Poenget med denne utstillinga er å visa mange bilde, visa parken og dammen gjennom året, med fleire ulike scenar.

– Eg grubla ei stund på kvar det kunne vera plass til noko slikt, og landa til slutt på å ha det utandørs, ved dammen som er fotografert, seier Knut Inge, som måndag heng bilda opp i snorer mellom trea på Kyrkjeflaten.