Trafikkulykke på Lunde

Måndag klokka 13.43 fekk politiet melding om ei ulykke på E39 Halhjemsvegen.

– Det er ei påkøyrsle bakfrå. Skadeomfang er foreløpig uvisst, skriv Vest politidistrikt på Twitter.

Dei oppdaterer med at tre bilar er involvert. Éin person er lettare skadd.

Eit vitne fortel at bilane hadde retning Os då samanstøyten skjedde. Ein mørk Mazda skal ha køyrd i hekken på ein VW Golf. I tillegg skal det ifølgje politiet vera ein tredje bil involvert.

Samanstøyten skjedde nær avkøyrsla til Lunde og Lekven.

– Det ser ut som om det er éin person i kvar bil. Nokon som såg ut til å vera frå kommunalt helsevesen var i nærleiken, og kom til for å hjelpa, fortel ein innringar som kom i bil nummer to bak dei som kolliderte.

Klokka 13.54 blei eitt av køyrefelta ope, og det er dirigering på staden.