Tok sin tredje VM-bronse
Kickboksar Ina Grindheim frå Os leia semifinalen 4-2, men missa med taktikken og er skuffa over at finaleplassen glapp.
Måndag starta VM i kickboksing, som blir arrangert annakvart år, denne gong i Antalya i Tyrkia.
Meisterskapen hadde 1011 deltakarar frå til saman 61 nasjonar, 17 av dei frå Noreg, osingen Ina Grindheim frå Pointfighter KBK var blant dei 17.
– Det har vore eit travelt og tøft år med ryggskade og skifte av jobb, men dei to siste månadane har eg vore aktiv med førebuingane og etter to bronsar håper eg no på finaleplass, sa Ina før avreise.
Suveren i kvartfinalen
Og VM, der Ina stilte i -65 kg, starta bra. Dommarane stoppa kampen og gav Ina sigeren då ho leia 10-0 over ei tysk jente ho også slo i verdscupen tidlegare i år.
– Ho har ein litt vanskeleg stil å gå mot, men det blei likevel ein komfortabel siger, seier Ina om kvartfinalen.
Italiensk juniormeister
I semifinalen sto italienske Antonella Esposito i motsett hjørne.
Ina slo Esposito 10-0 då dei møttest for 1,5 år sidan, men den unge italienske motstandaren har blitt sterkare sidan den gong.
– Ho vann junior-EM for to månadar sidan, så eg visste at ho ville yta motstand. Vi la opp ein taktikk ut frå at ho plar vera rastlaus med å angripa, og det fungerte i dei første to rundane.
Etter to av tre rundar leia Ina 4-2. Men Esposito fekk inn eit godt spark tidleg i siste runde og på 4-4 fungerte ikkje Ina sin kontringstaktikk lenger.
– Ho ville ikkje angipa, og då eg tok initiativ fekk eg smaka eigen medisin. Det sto 4-5 og eg måtte på offensiven igjen, seier Grindheim, som tapte 4-6.
– Bronse er bra, men etter ein kamp der eg missa med taktikken, ein kamp der eg verken fekk kjempa med nebb eller klør, kjennest det litt surt å mista finaleplassen.
Fleire norske medaljar
Noreg har samla sett uansett gjort det bra.
Birgit Reitan Øksnes og Cathrine Heggøy Fonnes har vunne gull og i morgon har Noreg fire andre utøvarar i finale.
I tillegg til Ina har desse tatt bronse:
Pointfight -84 Kg Veteran, Tom E Steinsland
Pointfight -89 Kg, Erik Brødreskift
Musical Forms, Inoka Eileen Skjønhaug
Dei fire norske finalane laurdag går mellom:Pointfight -50 Kg, Monica Engeset vs Giulia Cavallaro (ITA)Fullkontakt -52 Kg, Marielle V. Hansen vs Yeliz Koblay (TUR)Fullkontakt -60 Kg, Thea Therese Vingmark Næss, vs Kinga Siwa (POL)Lettkontakt -65 Kg, Madelen Søfteland, vs Nicole Trimmel (AUT)