Tok fighten og vann
Handballjentene til Os vann tre av tre kampar i den nasjonale Bringserien og kjempar om sluttspel-plass. - No er det opp til oss sjølv, meiner Kenneth Husebø.
16 års-jentene til Os har så langt levert ein svakare sesong enn mange trudde. Dei var tippa som eit av topplaga i den nasjonale Bring-serien, men har slitt med å få uttelling. I helga kom endeleg full pott med siger i tre kampar og seks poeng.
- Kampane i helga retta mykje opp på det.
- I helga tok jentene fighten og kriga det dei kunne både i angrep og forsvar, fortel ein nøgd Kenneth Husebø.
Var aldri uroa
Laurdag slo dei Sola 21-20 og Førde 27-23.
- Sjølv om kampen mot Sola blei jamn, var eg aldri uroa for at vi ikkje skulle ta med oss båe poenga.
- Det var noko med tempoet og innsatsviljen jentene viste som gav meg trua.
- I kampen mot Førde låg vi foran heile vegen og styrte. Sjølv om Førde tok litt innpå i andre omgangen, så hadde vi grei kontroll på kampen, analyserar Husebø.
Tre forskjellige bestemannsprisar
Også i helgas siste kamp på sundagen mot arrangørklubben Tastavarden tok Os-jentene ein grei siger 28-21.
- Igjen var det ein kamp vi hadde god kontroll på.
Ekstra kjekt tykkjer trenaren at han fekk tre forskjellege spelarar som blei kåra til Os sin beste spelar i kampane.
- I første kampen blir Anna Bjørke Kallestad kåra til vår beste, før Stine Færøvik og keeper Hanne Sørstrønen blir det i dei to siste, fortel Ostrenaren.
Ligg to poeng bak
Sluttspelet i Bringserien spelast mellom dei fire beste i kvar av dei tre puljene. Før det heile skal avgjerast skal det spelast ei siste innleiande runde.
Osjentene møter då serieleiar Gneist, som så langt er ubesigra, tabell-firar Åssiden og Gjøvik HK som ligg på 8. plass. Sjølv ligg Os to poeng bak Åssiden på femte plass.
- No er det berre opp til oss sjølv.
- Vi skal kunne slå alle desse tre laga, men då må vi skru opp fighter-instinktet, tempoet og gutsinga enno eit hakk.
- Sluttspelet er innan rekkjevidde, og vi skal gjera alt for å nå det, forsikrar Husebø.