Tjuveri frå bil, slåsting og ruteknusing

Fredag fekk politiet melding om tjuveri frå ein bil som sto parkert i eit bustadområde på Hatvikvegen.

Tjuveriet har skjedd ein gong mellom torsdag og fredag.

– Fleire gjenstandar er sakna frå bilen. Det kan sjå ut som om bilen var ulåst, fortel politioverbetjent Martin Nordeide.

– Sjølv om mange av oss bur landleg, er det greit å hugsa å låsa både bil, garasje og bod. Det er ikkje kjekt om noko blir stole.

Rop, skrik og smell i eksosanlegget

Fredag i 12-tida på dagen fekk politiet melding om ein mann som gjekk og ropte og skreik, og var til sjenanse for andre i Os nord.

Politiet rykte ut, fekk kontroll på vedkomande, og har oppretta sak.

Utover fredagskvelden kom fleire meldingar om ufin køyring og støy frå fleire bilar og MC-ar. Litt før klokka 02 kom det ny melding, og tre MC-ar blei stoppa i Os sentrum.

– Alle hadde førarkort. Den eine av dei fekk pålegg om å visa motorsykkelen sin for full teknisk kontroll hos vegvesenet. Førarar og passasjerare er frå 15 til 17 år, og blei sendt heim.

Slåsting og knust rute

Klokka 03.26 natt til laurdag fekk politiet melding om slåsting i Os sentrum. I løpet av slåstkampen skal eit butikkvindauge ha blitt knust.

– På staden møtte vi ein som skal ha vore medverkande i slåstkampen, ein mann i 30-åra. Han framsto som uskadd og ville ikkje melda sjølve slåstinga, men om butikkeigar vil melda ruteknusinga så blir det nok sak av dette.

Det er foreløpig uvisst for politiet kven den andre parten i kampen var.