Tivoli til Os i juni
– Det skal bli godt å koma til Os igjen, seier tivoliveteranen Roy Andersen frå Skandinavisk Tivolipark.
Skandinavisk Tivolipark, som også var i Os i 2011, kjem tilbake i midten av juni.
– Først skal vi til Sunnhordland, til Sveio og Husnes, men torsdag til søndag 13. til 16. juni er vi i Os, seier Roy Andersen frå Fredrikstad.
Over 40 år i bransjen
Andersen har vore på Os mange gongar, både på 70-talet og seinare, som aktør i musikkbransjen og som fotballspelar.
– Men no er det berre tivoli det handlar om, seier Andersen, som har vore tivoliformidlar i over 40 år.
Rutinert mannskap og spennande utstyr
– Vi har ein tettpakka turné frå Østfold til Nordland. Heile sommaren er booka opp og det er ein rutinert gjeng med mykje gøy utstyr som reiser rundt.
– I 2011 hadde vi det veldig bra i Os, og eg har forstått det sånn at det til no i år ikkje har vore tivoli i bygda, så då håper eg vi får det minst like kjekt i år.
Tivoliet blir som vanleg dei siste åra montert opp på grusbanen ved Os ungdomsskule.