Tim blir trenar
Tim Henrik Sperrevik har runda av ei lang karriere som spelar. No blir han trenar for gutelaget til Os.
Bildeserie:
Laurdag spelte Tim Henrik Sperrevik sin siste kamp for Os då han kom innpå i 2. omgang mot Nest-Sotra. Før kampen blei han overrekt ein bukett av fotballformann Terje Hjertnes som takk for lang og innhaldsrik teneste.
34-åringen blei med skåringsteft, god fysikk og høgt temperament tatt opp i A-stallen til Os i ung alder. Sidan har det blitt spel for både Fana, Hartlepool og Bregenz.
I Os har han vore toppskårar i tre av dei siste fem åra, i fjorårets opprykksesong blei det 20 mål, i år 3, alle på bortebane.
Blir gutetrenar
No er det slutt, men Tim kjem framleis til å bruka mykje av tida si på Kuventræ.
- Eg overtar etter Per Olav Sørås som trenar for gutelaget til Os, fortel Tim Henrik.
Starta med sonen sitt lag
Det var som assistent-trenar for sonen Henrik (8) sitt minilag at Sperrevik meldte seg på trenarkurs.
- Det gav meirsmak, så vinteren etter tok eg Trenar 2-utdanninga, fortel Tim.
Skal styra 50 spelarar
Smågutelaga som blir gutelag neste år har rundt 30 spelarar, i tillegg er det 18 frå 95-kullet som framleis er gutespelarar i 2011.
- Det blir ei stor gruppe, men eg får med meg fleire i trenarteamet. Kven det blir er ikkje heilt avgjort enno, men vi skal nok få det kjekt i lag med desse snart vaksne spelarane til Os, trur Tim.