Tilrår gangsti under Hatvikvegen

I eit møte mellom Os kommune og Statens Vegvesen, og seinare i eit notat frå kommunen til vegvesenet, har ein skissert ulike løysingar på korleis ein kan sikra Hatvikvegen for mjuke trafikantar.

No har kommunen fått svar frå vegvesenet og aksept for fleire av løysingane.

Rår til tre meter brei turveg

– Statens vegvesen kan vere positiv til at det vert etablert ei mellombels løysing langs Hatvikvegen ved å gruse ein sti slik de har skissert i notatet. Føresetnaden er at stien må ha avstand til Hatvikvegen lik tryggleiksavstanden på 3 meter frå vegkanten på fylkesvegen.

– I krysningspunkta med Hegglangsdalsvegen (fv552 hp 1 m 2886) og Bøvegen (fv 552 hp2 m 320) må stien trekkast tilbake 5 meter. Vegetasjon som er høgare enn 0,5 meter i siktlinja for krysningspunkta må fjernast, og haldast nede i heile bruksperioden. Det gjeld og vegetasjon i siktlinje ved busslomme ved avkøyrsel til Bøvegen (fv 552 hp2 m 320).

– Vi rår også til at breidda på stien vert 3 meter slik at det er muleg for barnevogner og rullestolar å bruke vegen. For ordens skuld legg vi til at det er kommunen sjølv som må drifte denne turvegen, skriv seksjonssjef Sindre Lillebø hos Statens Vegvesen.

Vil ha gangveg under Hatvikvegen

I andre enden av turvegen, ved Bøtræet, skisserte kommunen to ulike løysingar. Ein gangveg under den eksisterande brua, eller eit kryssingspunkt oppe på vegen.

– Statens vegvesen si tilbakemelding til dette punktet er at det må leggast til rette for gangsti under eksisterande bru (vår ref: fv552 hp 2 meter 604), tilsvarande det som er regulert i planen for Hatvikvegen. Ei løysing med kryssing i plan er ikkje ønskjeleg av trafikktryggleiksomsyn, er det tydelege svaret frå vegvesenet.

Må følgje områdereguleringa

I krysset ved Klyva er vegvesenet like tydelege i si tilbakemelding.

– Her vil Statens vegvesen krevje at det vert bygd eit kryss slik det er regulert i områdereguleringsplan for Hatvikvegen. Løysinga som er regulert tar dei omsyna som kommunen etterspør, og sikrar god og trafikksikker avvikling av trafikken for køyrande, gåande og syklande på begge sider av Hatvikvegen, konkluderar Lillebø i svaret.

Føreset kommunal finansiering

I tillegg påpeikar han at det er kommunen som må finansiera tiltaka.

– Ettersom det ikkje er løyvd midlar til Hatvikvegen enno, er det kommunen som må sørge for finansiering av tiltaka som er omtalt her. Det gjeld også etablering og drift av midlertidige anlegg.

Fylkeskommunen har i samtaler med vegvesenet opplyst at kommunen kan søka tilskotsmidler til haldeplass/kollektivløysing i krysset ved Klyva.