Til sak mot Rieber

I 2009 var det 50 år sidan Torolf og kona Rigmor bygde fabrikk for å masseprodusera Inger, mor til Torolf, sine lefser. Hausten 2010 fortalte Rieber & Søn, som kjøptefabrikken i 1989, at dei såg etter ny fabrikk for å auka produksjonen av den populære Vestlandslefsa.

I mai i fjor blei det kjent at Rieber & Søn hadde kjøpt ein annan lefsefabrikk, Lierne i Trøndelag.

Hausten 2011 blei dei tilsette på Os informert om at produksjonen ville blir flytta til Lierne 1. juni 2012. Tida etter har, ifølgje fleire av dei tilsette, vore prega av lite informasjon og ein del feil informarmasjon.

– På allmøte i haust fekk vi høyra at dei allerie hadde elta, kjevla og steikt kopi av Vestlandslefsa på Lierne, med godkjent resultat. Ei stund seinare kom ein delegasjon ned til Os for andre gong for å sjå på produksjonen vår. Då fekk vi inntrykk av at dei hadde problem med alle dei tre viktigaste ledda i produksjonen, fortel tillitsvalt ved Toro Os, Stian Kyte.

– Vestlandslefsa er produsert på skreddarsydde maskiner, det er ikkje berre til å kjøra dei gjennom eit anna system. Den er vanskeleg å kopiera sjølv om du har oppskrifta, legg han til.

Derfor har fleire av dei tilsette ikkje hatt tru på leiinga eller flyttedatoen, nokre av dei meiner dessutan at oppseiinga er usakleg.

– Avsluttar på torsdag

Men hos Rieber & Søn seier dei at produksjonen no går for fullt hos Lierne.

– Vestlandslefsa er i produksjon i Trøndelag og siste dag med drift på Os blir torsdag 31. mai, seier kommunikasjonsdirektør Geir Mikalsen til Midtsiden.no.

Han fortel at Lierne har ein meir stabil produksjon og at dei no produserer større volum enn Os har gjort.

– Men jobben med å kopiera Vestlandslefsa har vore tøff, innrømmer Mikalsen.

8 av 10 likte originalen best

Smaken, konsistensen, det litt seige bittet - dei tilsette ved Toro Os, fabrikken på Bø, har tvilt på at Vestlandslefsa er like god når den ikkje blir produsert på Vestlandet.

– Vi har hatt fleire testar. Eg vil ikkje kommentera nokre enkelttestar, men vi er nøgd med resultatet, seier Mikalsen.

Kyte kjenner til at det er gjort to testar ved hovudkontoret på Nøstet i Bergen.

– I den eine testen var det eit fagpanel på 20 personar. Resultatet frå denne testen fekk vi aldri.

– I den andre testen var det 96 deltakar. 77 prosent av dei kjente igjen originalen, den som er produsert på Os, og likte denne best, seier Stian Kyte.

Blir ståande i stillinga

– Dei 8 som vil prøva saka for retten er dei som har jobba lengst ved fabrikken. Sidan Os er ei avdeling av Arna meiner dei at ansienniteten bør samanliknast med dei i Arna og vera god nok til at dei blir verande i Rieber & Søn, seier Kyte.

Ein av dei har jobba i 38 år i konsernet.

– Vi meiner oppseiinga er sakleg, seier Mikalsen til Midtsiden.no.

Dei 8 har kravd å få stå i stillinga til tvisten er løyst i retten.

Kva dei 8 skal gjera på ved fabrikken er uvisst, for torsdag skal den siste Vestlandslefsa steikast i Os, over 50 år etter at eventyret starta.

Fakta om Vestlandslefsa

• Inger Bøe frå Os starta produksjonen i kjellaren sin for over 50 år sidan.
• Sonen Torolf Bøe og kona Rigmor starta fabrikkproduksjon av Vestlandslefsa i 1959.
• På slutten 70-talet byrja produksjon av ferdigsmurte Vestlandslefser.
• Fabrikken blei selt til Rieber & Søn i 1989 og heiter no Toro Os.
• Blir no selt i tre variantar, tørre lefser, smurte lefser (smør, sukker og kanel) og smurte lefser med eplesyltetøy.
• Produserer 70/30 smurte/tørre lefser, 1 lefse i sekundet, i to skift.
• Omsetnaden av smurte lefser auka frå 13 til 15 millionar enkeltlefser frå 2007 til 2008.
• Våren 2011: Rieber & Søn kjøper Lierne Bakeri.
• 1. juni 2012: Produksjonen blir flytta frå Os til Lierne. 20 tilsette på Os mister jobben.