Til legevakt etter slåstkamp

Promillekøyring, bråk på utsestadar og slåsting i drosjekø og på privatfest var blant det politiet fekk melding om natt til søndag.

Klokka 01.30: Ein mann i 30-åra skal ha vore ufin mot ei jente og krangla med andre gjestar og med dørvakt før han blei sendt i marsj frå staden. Ein jamgamal kamerat skal ha kasta seg på. Politiet møtte dei to på bussterminalen i sentrum. Den eine blei meldt for forholdet og begge fekk pålegg om å fjerna seg frå Os sentrum.

Klokka 02.48: Politiet observerer ein gjest i krangel med ein dørvakt. Gjesten skal ha vore i klammeri med ein annan gjest og gått utan å betala for seg. Vedkomande skal ha vore svært full, men var ifølgje politiet stand til å laga ein avtale om å koma tilbake ein annan dag og betala.

Klokka 03.00: Politiet rykker ut til ein rivatfest litt sør for Os sentrum. Her hadde det vore slåstkamp. Fornærma hadde smerter i munnen og blei køyrd til legevakt. Den andre involverte hadde gått frå festen før politiet kom fram. – Det blir opp til fornærma å melda vedkomande, seier vakthavande politibetjent.

Klokka 03.25: Det kjem melding om slåsting ved drosjesentralen. Politiet er på lekevakten, men er på staden ti minutt seinare. Då var det mykje folk, men roleg i køen og ikkje spor etter involverte kamphanar.

Klokka 03.46: Politiet får tips om mogleg promillekøyring på Halhjemsvegen. Dei får registreringsnummeret på bilen, men finner ikkje denne verken på Halhjemsvegen eller på adressa til eigar.