Tett med fisk i hamna

Dei siste dagane har det stått store mengder aure under Osbrua nedst i Oselvo.

– Eg har sett han står der. Laksen kjem ikkje før i april, dette er nok aure som kjem inn frå fjorden på grunn av at det er mykje lus på oppdrettsfisk enkelte plassar, seier den ivrige hobbyfiskaren Leif Juvik.

Det hender at fisk sym mot brakkvatn og ferskvatn for å drepa lusa, om dei har fått lus på seg.

– Det er i alle fall ikkje for å eta, dei finn ikkje mykje mat i elva på denne årstida.

Formann i fiskeutvalet i Os jakt- og fiskelag, Einar Sørstrønen, støttar teorien.

– Det er nok for tidleg at fisken er her for å gå opp elva, seier Sørstrønen.

– Interessant

Hos Rådgivende Biologer seier forskar Steinar Kålås at det er svært interessant om villfisken har lus på denne tida av året.

– Hadde det ikkje vore for at eg er i utlandet så ville eg tatt turen til Os med det same. Der ville eg tatt på dykkarmaske og hoppa uti og sett på fisken, for å sjå kva art det er og om den har lus, seier Kålås.

– Tidleg på 90-talet var første gong vi og enkelte andre land, som Irland og Skottland, observerte at smolt på veg ut i fjorden fekk lus på seg og gjorde retur til elva for å få den av.

– Men februar er for tidleg og for kald, vil eg tru. Om lus er årsaka til at fisken søkjer brakkvatn så er det heilt spesielt.

Lusa trivst vanlegvis best dess varmare det er. Bortsett frå i 1997.

– I 97' var det så varm sommar at lusa døydde. Rundt 20 gradar ser ut til å vera smertegrensa. No trur eg rett og slett kulde i sjøen er årsaka, laksen klarer seg, men auren liker ikkje kaldt sjøvatn, seier forskaren.

– Kulde er årsaka

Hos ein av konkurrentane til Rådgivende Biologer, Uni Miljø, fortel forskar Sven Erik Gabrielsen (frå Os), om same teori; kaldt sjøvatn.

– Når det er kaldt i sjøen får auren rett og slett problem med saltbalansen. Då søkjer den brakkvatn, som i utlaupet til Oselvo, for å få orden på dette, seier Gabrielsen.

Heller ikkje han har tid til å koma og sjå på fisken, men seier at det er interessant at det står mykje fisk ved elveosen.

– Sidan det var mykje laks i Oselvo i fjor kan det henda at noko av fisken er vinterstøingar på veg ut. Men også det er litt tidleg.