Temaveker med fisk i fokus
Besøk på oppdrettsanlegg, sløying av fisk og servering av fiskeburgarar – i Øyane får barnehageungane ekstra god innføring i det maritime.
Bildeserie:
På Søre Øyane barnskule har dei ei årleg maritim veke.
Her kan du sjå bildeserie frå maritim veke i 2014.
Men også i barnehagen får ungane bli betre kjent med livet i sjøen.
– Fiske er framleis ei viktig næring i Øyane. Vi er opptatt av nærmiljøet og er så heldige at vi har kort veg til sjøen, seier pedagogane Monica Røttingen Møller og Renate Bastiansen frå Søre Øyane naturbarnehage.
Viktig og allsidig lærdom
«Livet i havet» er fast, årleg tema i barnehagen i juni. I løpet av temavekene har ungane fått vore i fjøra og fanga krabbar og besøkt eit av oppdrettsanlegga til Lerøy Sjøtrol, der dei fekk vera med og mata laksen.
– Gjennom dette temaet lærer ungane både om fisk, kultur, næring og respekt for naturen.
Naturbarnehagen i Øyane er ein «Fiskesprell-barnehage», og flettar dette temaet inn. På nettsida til Fiskesprell har dei funne mykje god inspirasjon.
– Vi ser også at alle fagområde er representert ved å jobba på denne måten.
Ungane har blant anna samla skjell og steinar og brukt desse i formingsaktivitet.
Frå fjord til fat
Barnehageborna har også fått innføring i sløying og filetering av fisk, og temavekene blei som alltid avslutta med eit godt fiskemåltid; fiskeburgar.
– Vi har heldigvis positive foreldre som er med og hjelper oss med gjennomføringa av desse temavekene. Dette er ein fin måte å avslutta branehageåret på, synest Monica og Renate.