Tek grep mot digital mobbing

Digital mobbing går føre seg alle plassar. Også i Os har det vore fleire tilfelle kor ungar og ungdommar i Os har blitt utsett for mobbing eller trakasering via facebook, sms eller gjennom blogginnlegg og liknande.

– Det skjer, og vi som foreldre er nok naive i forhold til våre eigne born.

– Vi trur ikke våre ungar gjer slikt, men veit du eigenleg kva ungane dine driv med på mobilen eller nettet, spør rektor Kåre Lutro ved Os ungdomsskule.

Følgjer med

Lutro fortel at dei har dyktige lærarar som følgjer med på nettet og kva som rør seg.

– Vi har ved nokre tilfelle kome over bloggar og innlegg på nettet som har vore graverande. Anten i form av sjikanering av andre eller kor spesielt unge jenter legg ut bileter som kan skada dei sjølv.

– Når vi har fått nyss i slike sakar tek vi ei samtale med elevane og foreldra. Det er ikkje alltid alt som blir publisert er særleg gjennomtenkt.

– I nokre tilfelle har vi òg sørga for at bloggar har blitt stengt grunna sjikanerande innhald, fortel rektor.

Svakt regelverk

No opplever ikkje rektoren dei store problema med mobilar på skulen, men fortel at han kunne nok ha ønskt seg eit sterkare regelverk frå statleg mynde.

– Tidlegare kunne vi inndra telefonen den aktuelle dagen og påfølgjande dag om det var grove overtramp mot ordensreglane.

– No har vi ikkje lov til det lengre. Vi måtte, saman med foreldreutvalet, gjera om regelverket etter pålegg frå statleg mynde.

– No har vi berre lov til å inndra telefonen ut den aktuelle dagen om elevane gjer alvorlege brot mot ordensreglane.

– Det gjer at vi som skule har blitt satt litt sjakk matt i høve til reaksjonar, fortel Lutro.

"Bruk hue"

No inviterer skule foreldre til stormøte i gymsalen på Os barneskule tysdag 5. november.

– Vi har vore så heldige at vi får besøk frå kampanjen "Bruk Hue".

– Det er Noregs største kampanje mot digital mobbing, som har vore rundt på meir enn 400 skolar sidan dei starta i 2010.

– Dei legg opp til eit informativt møte kor dei berørar tema som mobbing, tryggleik og kva vi sjølv kan gjera.

– Undersøkingar dei har gjort viser at 3 av 4 elevar står betre rusta til å handtere digital mobbing etter at dei har vore på besøk og at 9 av 10 foreldre lærar kva ein kan gjera for å begrensa digital mobbing og kor ein kan henvenda seg for å få hjelp.

– Sjølv om vi primært inviterar foreldre og føresette ved ungdomsskulen, så er møtet òg ope for andre interesserte, avsluttar Kåre Lutro.