Tatt ut til landslagssamling
Anna Bjørke Kallestad frå Os blei måndag tatt ut til jentelandslaget si samling i Skien.
Handballforbundet tok måndag ut troppen til landslagssamlinga for jentelandslaget (jenter fødd 1996) i Skien 18.-22. april.
Blant dei 24 jentene som er kalt inn til samling med landslagtrenerane Bendik Berg og Jeanette Nilsen finn vi høgreback Anna Bjørke Kallestad frå Os.
- Gratulerer med uttaket. Var det kjekt?
- Ja, dette var kjempegøy.
- Eg hadde ikkje fått noko signal på førehand om at eg var aktuell og blei litt overraska då eg fekk meldinga, stråler osspelaren i kapp med sola frå påskefjellet.
Spelt på Bylaget
Bjørke Kallestad har spelt på det regionale bylaget dei to siste sesongane og vore ein viktig spelar for Os sitt lag i den nasjonale Bringserien denne sesongen.
- Eg gler meg veldig til å reise på samlinga. No har eg blitt kjend med fleire av dei andre jentene som er tatt ut, så det skal bli gøy å møta dei igjen.
Den hardskytande høgrebacken var også i januar på landslagssamling. Då saman med lagvenninne Vilde Brattabø i det som var den første storsamlinga for spelarar fødd i 1996.
Saman med Brattabø og Marte Haugsdal var Bjørke Kallestad også på ei regional landslagssamling rett før påske i Haukelandshallen.
Eitt år eldre Eva Kristiansen er òg aktuell for landslagssamling i same periode då ho er tatt ut som reserve for ungdomslandslaget.