To tatt for innbrot
To menn er tatt for innbrot i eit bufellesskap, to gutar blei tatt då dei klatra på taket på Os Taxi og rådhuset.
Fredag i 13-tida fekk politiet melding om innbrot i ein leilegheit i bufellesskapet Vartun.
– Innbrotet hadde nettopp skjedd. Han som bur der var ikkje heime, fortel vakthavande ved Os lensmannskontor.
Politiet i Os har endra rutiner med høg prioritet på straksetterforsking.
– Vi blir derfor verande lengre ute på åstaden, med tilhøyrande vitneavhøyr, men det viser seg å ofte vera effektivt.
To personar i slutten 20-åra og i 30-åra var observert av vitne og politiet ransakte tre adresser. På éi av dei fann dei tjuvgodset, noko elektronikk, og dei to mistenkte blei pågripen.
– Ein av dei blei dimittert etter kort tid, han andre blei tatt med til arresten i Bergen.
Klatra på taket
Klokka 21.30 fredag kveld fekk politiet melding om to gutar som klatra på taket på drosjebua og på rådhuset.
Politiet rykte ut og fann to gutar i 13-14-årsalderen.
– Dei to kom seg trygt ned og fekk ei åtvaring. Episoden er notert hos oss.
Audi i høg fart
Politiet rykte ut til Halhjemsvegen etter melding om høg fart i 21.45-tida.
– Meldar hadde blitt forbikjørt i noko som han skildrar som ekstremt høg fart.
– Vi fann bilen på heimeadressa, men lykkast ikkje i å få kontakt med eigar. Vi ringte opp igjen til meldar og fekk ei meir detaljert skildring av kjøringa og kjem til å følgja opp saka.
Pipebrann og trafikkontroll
Fredag formiddag hadde politiet trafikkontroll på Søfteland.
Tre bilistar blei ilagt gebyr for ulovleg bruk av mobil.
Klokka 17.20 kom melding om pipebrann i Borgavegen. Brannvesenet rykte ut.