Tatt av hai
Dagen før han sjølv skulle på haidykking var osingen på stranda der ein mann tysdag blei eten av ein enorm hai.
Bildeserie:
Etter safari i fleire parkar søraust i Afrika skulle Frank Bruarøy og resten av reisefølgjet på fire på haidykking i Sør Afrika. Dagen før, tysdag 12. januar, sto avslapping og bading på Fish Hoek beach i Capetown på programmet.
- Det siste drosjesjåføren snakka om før han sette oss av på stranda var kor sjeldan haiar angrip, og at han sjølv aldri hadde sett hai, fortel Frank.
Han hadde akkurat lagt seg ned på stranda, etter ein rundtur med taxi og leik med nokre pingvinar i området, då folk kom springande opp frå sjøen.
- Det var ein stor blodpøl i sjøen og redningsmannskap reiste ut med båt for å prøva å hjelpa. Det var berre rundt 1,5 meter djupt der haien angreip, fortel han.
Saka blei toppoppslag i lokale aviser og tv-sendingar denne veka. Også Bergens Tidende og The Guardian har skrive om det spesielle angrepet, der ein 37 år gamal mann frå Tanzania blei eten.
- Redningsmannskapet gav raskt opp. Det var ikkje håp om å finna kroppsdelar ein gong, for haien kom tilbake etter restane. Det skal visst vera sjeldan at hai angriper mennesker to gongar etter kvarandre, seier Frank, som gjennomførte haidykkinga dagen etter, men då i bur.
Midtsiden.no kjem tilbake med bilde og film frå både safarien og stranda der ulykka skjedde.