– Tapte for eit betre lag
Cupeventyret for handballdamene fekk ein brå slutt då dei tapte 21-31 for Sola tysdag ettermiddag.
Kunne Os igjen sprenge cupbomba var spørsmålet mange stilte seg då dei kom i Oshallen tysdag ettermiddag. Etter å ha slått ut Fana i første runde, var spenninga stor om dei kunne klara det same i møtet med 1. divisjonslaget Sola.
Osdamene gjorde ein heilhjarta innsats, men måtte innsjå at Sola var raskare og sterkare.
– I dag tapte vi for eit betre lag.
– Dei spelte med eit tempo som er mykje høgare enn vi er vande med frå den heimlege serien. Likevel er eg nøgd med innsatsen til jentene, seier Ostrenar Erlend Lyssand.
Tøffe i forsvar
Os viste at også dei kan spela forsvar. Med Emilie Hjertnes Halhjem, Line Hjelle og Marte Øvreeide som hærførarar satte dei taklingar så det suste etter.
– Eg er særs nøgd med korleis vi startar kampen. Vi held godt følgje med Sola. Det er berre litt for dårlege avslutningar og dårlege val i angrep som gjer at dei rykkar frå, meiner Lyssand.
Trå start på 2. omgang
Etter å ha lagt under 8-13 til pause får Os ein trå start på andre omgangen, med ein spelar mindre på banen.
– Sjølv om vi kjem bakpå skal jentene ha skryt for at dei ikkje gjer opp, men klarar å hente seg inn att i kampen.
– Med det tempoet Sola set opp blir vi dyktig slitne utover i kampen. Samstundes er det godt å få kjenne på kva krevs i toppen, avsluttar Lyssand.
Os – Sola 21-31 (8-13)
Utv: Os 1x2 min, Sola 1x2 min.
Os sitt lag: Vibeke Ingebrigtsen, Hanne Sørstrønen, Irene Tangerås (2), Madeleine Hjertnes (2), Silje Martine Årseth, Emilie Hjertnes Halhjem, Maria Stangeland Lunde (1), Hilde Kristine Røttingen (1), Line Hjelle Berentsen (7), Silja Espelid, Elise Hjelle (4), Eline Mikkelsen, Vilde Fyllingen, Marte Øvreeide (4).