Taper mykje pengar - deler likevel ut underhaldning

Søsterbedrifta Catten Nightclub stengte dørene då det blei skjenkestopp. Dei hadde plan om å ha ope, men redusera frå 7 til 6 dagar i veka, då meldinga om skjenking til midnatt kom.

Men full skjenkestopp frå natt til torsdag gjorde at nattklubbdrivarane tok tidleg juleferie, også utan håp om å få til noko første juledag, som normalt er årets største festdag i Os.

Søsterbedrifta Elvehuset, med restaurant og livebar, held ope, men med redusert opningstid.

– Oktober, november og første helga i desember var bra. Så måtte vi avlysa fleire konsertar, seier Jostein Eck.

Face2Face, Roll & Rock, Cover Up og ein jam i romjula blei avlyst.

– Til saman 300 gjestar avbestilte julelunsj, julebord og catering. Samla har vi nok eit tap på oppunder 400.000 kroner grunna denne nedstenginga.

Juleforteljing og musikk

Eit arrangement som likevel ikkje blir avlyst, er laurdagens kombinasjon av diktlesing og julemusikk.

Forfattar Bente Bratlund les juleforteljingar, gitarist Erik Rolland speler akustiske julesongar.

Denne er på dagtid, klokka 14.

– Vi kan ha berre 15-20 gjestar inne, avhengig av om dei er i same husstand og kan sitja tett eller ikkje.

– Derfor vil vi i tillegg ha ei streaming. Vi gjer dette for artistane sin del, og for publikum, og håper folk gler seg over å likevel få servert litt lokalkultur.

Også konsert med Blue Note Shuffle vesle nyttårsaftan blir løyst på same måte, med eit lite livepublikum og streaming ut til andre som vil ha lokal, levande musikk i jula.