Tangerte verdsrekorden
Video: Fire dagar etter at han kom på topp 10 i NM gjorde Sondre Ø. Aksnes noko berre fire andre i verda får til.
Bildeserie:
Freestyle-Sondre deltok nyleg i NM i Oslo, der han landa på ein fin 10. plass.
– Det starta med ein innleiande runde der du hadde eitt minutt på deg å visa kva du kan. Så blir du rangert for seeding i neste runde, der det er battle, forklarer Sondre.
Les òg: Passerte 14.000 følgjarar på Instagram
17-åringen frå Os blei rangert som nummer 10 av 18 deltakarar og måtte i mann til mann-kamp mot han på 7. plass.
– Eg visste at han er god, og at han er betre enn meg til å sitja å triksa, så eg visste at eg måtte ta nokre vanskelege triks for å slå han. Eg gambla, men feila litt for mykje, dermed gjekk eg ikkje vidare.
– Men eg er nøgd med å koma på topp 10, seier Ødegård Aksnes om NM, som blei arrangert fredag 13. november.
I verdsklasse på heimebane
Heime i Os var han rask med å koma seg i trening igjen, og hos sponsor Sprek og Blid var han tysdag 17. november under tak for å triksa vidare.
– Eg prøvde meg på ein 4x Magellan in-in og kunne nesten ikkje tru det då eg fekk det til.
Magellan (etter den portugisiske jordomseglaren Ferdinand Magellan) in-in er dobbelt «jorda rundt», med foten innover på begge rundane. Sondre visste frå før at fire på rad er verdsrekord.
– Eg delte historien og videoen med andre i miljøet, blant anna fire gongar verdsmeister Andrew Henderson, og det ser ut som om det berre er fire andre i verda som klarer dette trikset! fortel Aksnes nøgd.
Sondre har hatt eit godt freestyle-år med fleire show både i Os og i Bergen, og held fram med å auka både i nivå og følgjarar.