Talentet René går for opprykk
NFF Hordaland tok ut fire dommarar frå eigen talentgruppe for treningsleir i Tyrkia. René S. Nordvik var éin av dei.
Bildeserie:
Fotballdommar René S. Nordvik frå Nore Neset il blei som éin av fire frå NFF Hordaland si talentgruppe tatt ut til treningsleir i Tyrkia i påsken.
– Det var eit lærerikt og inspirerande opphald, der vi blant anna dømte åtte treningskampar kvar, fortel René.
Fotballkretsen spanderte reisa.
– Det var berre oss fire frå Hordaland saman med vegleiar frå kretsen. Dette var god terping før seriestart.
Inn på Norcore
Talentgruppa består av ni dommarar frå 18 til 25 år i alder. Denne gruppa er delt i tre ut frå nivå.
René er no òg tatt ut på Norcore trinn 2, eit opplegg der det er éin av kvart kjønn frå kvar region som blir invitert til to samlingar, éi i april, éi til sommaren, under Norway Cup.
Dette blir sett på som eit «landslagsuttak» for dommarar, ifølgje fotball.no.
Fem års erfaring
Som 15-åring fekk René, som fleire andre på hans alder, tilbod om opplæring og oppdrag som rekrutt-dommar. For to år sidan blei han plassert i seniorfotballen.
I april fyller René 20 år, no drøymer han om å leva av å dømma fotballkampar.
– Førebels har eg det som hobby, men det er i grunnen ein god deltidsjobb samtidig, ved sidan av skule.
I 2013 dømte han både Plussbankcup og Norway Cup. Han har vore tilbake til Ekeberg og i fjor dømte han blant anna finalen i jenter 16.
– For dei som vil utvikla seg vidare har forbundet og kretsen gode opplegg. Å dømma cupar om sommaren er veldig kjekt, eg skal tilbake til Norway Cup i år òg.
– Har du aldri hatt opplevingar som har vore så negative at du har vurdert å finna deg ein annan hobby?
– Nei. Det har naturlegvis vore negative opplevingar og det er forskjell på gode og dårlege dagar på jobb. Har eg ein dårleg dag så merkar spelarane det. Men eg kan lova deg at den som er mest irritert etter ein dårleg dag er meg sjølv.
– Korleis merker du at du har blitt ein betre dommar i løpet av desse åra?
– Eg merker det mest på korleis eg handterer det å vera kampleiar, og korleis eg taklar ulike situasjonar. Erfaring hjelper. Det går og på «smartness», på avgjerdene du tar og på kva du overser.
Hovuddommar i 4. divisjon
I år, som i fjor, er han sett opp som hovuddommar i 4. divisjon og assistentdommar i 2. divisjon.
– Det var godt å koma seg opp i divisjonane, å få assistentar på linjene.
– Målet er heilt klart å rykka vidare opp til 3. divisjon i år, seier han.
Opprykk avhenger av observatør sitt syn på René si dømming. Rapportane han får etter at det har vore observasjon under kamp er grundige, eventuelle opp- og nedrykk kjem etter ei samla vurdering når sesongen er over.
René startar serien med å dømma Osterøy-Bønes (i naboavdelinga til Os 2) i morgon, 4. april.