Taktikken og taklingane
Bildeserie og kommentarar etter Lysekloster - Brann.
Bildeserie:
Lysekloster gjorde god figur i dagens NM-runde mot eliteserielaget Brann, men tapte 0-2 etter sjansesløseri mot eit Brann på halv maskin før pause.
Heimelaget skulle truleg òg hatt straffe på stillinga 0-0.
I andre speleminutt er Ole Thomas Herrem åleine med keeper Alex Horwath. Han får heada ballen forbi keeper, men dei to kolliderer stygt.
– Vi såg reprisen i pausen. Det er soleklar straffe, her synest eg dommaren rett og slett er feig, seier sportssjef Svein Kollen til Midtsiden etter kamp.
Både Lysekloster-trenar trenar Ruben Hetlevik og tidlegare trenar, Ørjan Sandal, er einig. Midtsiden har ikkje lykkast i å få kommentar frå hovuddommar.
Herrem heldt ut eit kvarter til, men måtte av banen grunna smerter i låret etter samanstøyten.
– Alle som kom innpå gjorde ein god jobb, men det var synd å mista Herrem i denne kampen. Han er spesielt farleg i bakrom og kunne ha truga Brann-forsvaret på ein eigen måte, noko som ville gjeve ekstra med rom for oss andre, seier Lysekloster-kaptein Joakim Helland etter kampen.
Dette var ikkje dei einaste store sjansane til Lysekloster før pause. Rett etter 0-1-skåringa hadde heimelaget tre cornarar på rad. I same periode kom eit innlegg som Horwath mista i beina på Lysekloster-angrepet. Pedersen skaut forbi keeper, men rett i ein Brann-forsvarar.
– Vi opptrer profesjonelt og gjer ting skikkeleg. Lysekloster har eit godt lag, men vi har kontroll, seier Brann-trenar Lars Arne Nilsen til NRK etter kampen.
Lysekloster - Brann 0-2 (0-1)
Målskårarar: Torgeir Børven (24.) og Sivert Heltne Nilsen (51.)
Lysekloster: 1 Chris Sunde Midtun, 3 Durim Muqkurtaj, 5 Kapinga Brazy, 9 Martin Pedersen, 18 Thorvald Trætteberg, 21 Denis Ljubovic, 7 Haakon Moldeklev, 11 Joakim Helland, 13 Ole Thomas Herrem, 17 Vladan Radojkic, 14 Kristoffer Østervold.
Reservar: 20 Håkon Fagerbakke Kvittingen, 12 Frode Moberg Øvredal, 2 Sigve Rørstad, 15 Ken Joar Føyen, 16 Marius Hodne Sivertsen
Dagens beste Lysekloster-spelar: Denis Ljubovic.
Brann: 1 Alex Horwath, 6 Vidar Ari Jonsson, 7 Peter Orry Larsen, 8 Fredrik Haugen, 9 Kasper Skaanes, 15 Bismar Acosta, 18 Azar Karadas,19 Deyver Vega, 22 Torgeir Børven, 23 Sivert Heltne Nilsen, 33 Amin Nouri.
Reservar: 10 Jakob Orlov, 12 Markus O. Pettersen, 17 Gilli Rolantsson, 20 Halldor Stenevik, 21 Ruben Kristiansen, 29 Kristoffer Barmen, 34 Marius Bildøy
– Planen fungerte
Ruben Hetlevik er skuffa over at Brann klarer å skåra to mål på dødballar, når laget hans på førehand hadde hatt fokus på akkurat dette.
Samtidig er han stolt over at dei klarer seg så bra, og skaper mange sjansar på Noregs nest beste fotballag.
– Strategien var å stoppa høgrekanten, å tvinga dei til å angripa via ein høgrebeint venstrekant. Det klarte vi. Brann fekk problem med å koma til sjansar, og det såg ikkje ut som om dei knakk koden før i slutten på første omgang. Då ba eg midtbanen min om å skyva raskare sidelengs, forklarer Hetlevik.
– Det var òg kjekt å sjå at spelarane våga å utfordra, at dei hadde det gøy. No håper vi berre at vi har Herrem klar til heimekampen mot Herd søndag.
Brann gira opp etter pause, og hadde god kontroll. I 51. minutt auka dei til 0-2. Det gjekk lengre tid mellom angrepa til heimelaget, men ei heading over mål av både Østervold og Ljubovic var blant det Lysekloster hadde å by på etter pause.
Publikumsrekord
Den førre publikumsrekorden på Edne var frå 1981, då Hald leigde bane av Lysekloster og spelte mot Os i 3. divisjon (dagens 2. divisjon).
Rekorden var på 1.124 tilskodarar.
Midtsiden har førebels ikkje fått eksakt publikumstal frå dagens kamp. Hovudtribunen tar 700, om den er heilt fylt opp og folk står på bakerste rad.
På motsett sidelinje sto det òg folk, både på midlertidig tribune og på haugen over klokka og måltavla.
– Det var berre 400-500 billettar som var selt på Brann Stadion før kamp, eg hadde venta litt fleire Brann-supportarar.
– Men eg reknar med at vi har hatt rundt 1500 inne, og det er bra. Sjølv om vi blei snytt for straffe, og burde hatt fleire mål, er vi nøgd med både det sportslege, den store dugnadsinnsatsen og gjennomføringa av NM-kampen, seier Svein Kollen.