– Ta vare på ungdommane dykkar!

Rusmiddelpolitisk handlingsplan 2013-2020 avdekkjer at foreldre er for lite bevisste si eiga rolle i høve ungdommar og rus.

Rapporten avdekkjer blant anna:

• For mange unge manglar struktur og kunnskap om farane ved rusmiddelbruk.
• For mange vaksne er for perifere i høve til barnas oppdraging
• Haldningar til bruk av rusmidler blant foreldre er prega av for lite medvet, foreldra treng meir kunnskap om si rolle og rusmidler.
• For få rusfrie tilbod til ungdommane, spesielt i helgane
• Bustad for rusmisbrukarar er generelt problematisk
• Vanskeleg tilgjenge til hjelpeapparatet
• Tidleg intervensjon er viktig/positivt med lågterskel psykologteneste

Vil ha ein plass å møtast

På vegne av prosjektgruppa som hadde utarbeida framlegget til ruspolitisk handlingsplan presenterte Jan Rune Bakke, ruskonsulent i Os kommune, funna og forslaga til tiltaksplan for tenesteutvalet førre veke.

– De seier at ungdommane etterlyser ein samlingsplass, men dei etterlyser ikkje nødvendigvis at det skal vera så mykje aktivitet der, forstår eg det rett, undra Helge Olav Nygård (KrF).

– Ja. Vi hadde møte med elevrådsrepresentantane på skulen. Det var veldig spesielt. Dei var heilt ærlege på at dei ikkje visste kva dei ville, men at dei ønska seg ein plass dei kunne møtast og henga i trygge omgjevnader, forklarte Marita Wallevik, leiar av førebyggande tenester.

– Men har de konkrete forslag/tanker rundt fritidstilboda/møteplassane, følgde Emil Tetlie Brimsholm (H) opp.

– Ein mogleg angrepsvinkel er å utfordra dei mange lag og organisasjonar som allereie driv veldig godt. Samstundes må vi òg utfordra vår eigne tenester og høyra korleis dei tenkjer.

– Kultursjefen har fått dette ansvaret og vil kalla inn organisasjonane og ungdommen til møte for å starta prosessen.

Uavklart rolle til rus

– De peiker på mange viktige ting i rapporten. Ein av dei viktigste tinga er kanskje det som står under forebyggande tiltak og viktigheten av å styrka foreldrerolla både mot førskulebarn og ungdom.

– Det er vel kjernen, vi tenkjer gjerne at ungdom som rusar seg kjem frå "risikofamiliar", men dei kjem vel frå alle typer familiar. Kva tenkjer de konkret kan gjerast, undra Arild Mats Nilsen (Ap).

– Det å vera forelder byr på mange utfordringar.

– Vår erfaring er at foreldre har ei uavklart haldning til rusmidlar. Dei skjønar ikkje at deira eige bruk og vanar påvirkar ungdommane.

– Samtalane vi hadde med ungdommane sjølv verdsett foreldre som er tydelege når det gjeld å setja grenser på desse tinga. Det er gjerne vanskeleg fordi foreldra sjølv ikkje veit korleis vera tydelig. Vi ønskjer å vegleia foreldra, svarte Bakke.

– Dette er kjempespennande. Vi har eit spennande opplegg på gang allereie i barnehagane i høve kva vi gjer for å forebygge rusproblematikk i tidleg alder slik at dei ikkje byrjar å bruke rusmidler allereie i 14 årsalderen, supplerte Wallevik.

– Det er bra at de er tidleg inne, men allereie i barnehagealder? Då tenkjer eg at dette er noko eg støtter, men som barnehagefar så er det ikkje ei aktuell problemstilling no. Kva gjer de når ungane blir større, følgde Helge Olav Nygård opp.

– Skulen er ein naturleg samarbeidspartner gjennom FAU og allmøter til dømes.

– Det handlar ikkje om å ta rusmidlar vekk frå Os, men å formidla kunnskap. Korleis beskytter ein ungdommane best, korleis robustgjer ein dei best mogleg.