Syklist krasja med traktor
Kvinne henta med luftambulanse i Langedalen.
Tysdag litt før klokka 19.30 kom melding om trafikkulykke i Langedalen.
– Det stemmer at det har vore ei møteulykke mellom traktor og syklist, seier brannsjef Stein Gjøsund.
Alvorleg skadd
Ulykka skjedde nær krysset mellom Langedalen og Lyseklostervegen.
– Syklisten, ei kvinne, blei alvorleg skadd i hovudet. Ho blei frakta til sjukehus med luftambulanse, som var raskt på staden, fortel politibetjent Kenneth Rastad.
Var på trening
Eit vitne Midtsiden har snakka med fortel at traktoren var på veg opp bakken då syklisten kom imot i høg fart. Syklisten skal ha kollidert med traktoren mellom framhjulet og bakhjulet.
– Vi har snakka med fleire vitne. Traktoren skal ha stått nærmast i ro, syklisten skal ha hatt høg fart, men det er førebels for tidleg å seia kva som var årsaka til ulykka, seier Rastad.
Kvinna var på trening med ei gruppe syklistar då uhellet skjedde.