Svippin-gründerane takkar 2000 osingar for hjelpa

Hana Colakovic og Michelle Sæther frå Bergen står bak appen «Svippin», eit resultat av ei masteroppgåve dei leverte som studentar ved Høgskulen på Vestlandet.

Dei to 25 år gamle damene vann innovasjonspris på skulen, fekk støtte av Innovasjon Norge og blei tildelt éin million kroner frå Norsk Forskingsråd.

Etter dialog med Os Sentrumsforening fekk dei bedriftene på Osøyro som første kunde, eit pilotprosjekt som starta 1. november i fjor.

Denne veka lanserer dei ein ny versjon av appen, og Os er med vidare.

– Vi har rundt 2000 brukarar i Os, der 70 prosent av dei er veldig aktive. Dei har samla inn over 40.000 poeng, både ved å svippa innom butikkar i Os, men òg på ulike fjelltoppar. Ein fantastisk aktiv gjeng! seier Hana og Michelle.

– Tilbakemeldingane frå desse, både dei mest aktive brukarane og dei som har brukt appen av og til, har vore viktig då vi gjorde utbetringane.

Nytt kart og ny «kva-skjer-pin»

Svippin-gründerane fortel om nokre «barnesjukdomar» i starten, blant anna med innlogging, og takkar dei første brukarane for at dei har vist tolmod.

– Samtidig har vi fått konstruktive tilbakemeldingar og gode tips. Desse har både vore med på å gjera at vi har fått luka vekk potensielle problem, og vore med på å forma ny versjon.

Versjon 2 av Svippin har ein heilt ny design. Den har dessutan fleire innloggingsmoglegheiter, forbetra ytelse og nytt kart. I tillegg til at fleire «bugs» er fjerna.

Nye Svippin har dessutan ein integrert «sentrums-pin» som fortel brukaren kva som skjer i nærleiken den nærmaste tida.

– Os Sentrumsforening er med ei stund til, vi ønskjer at dei skal få fullt utbyte av Svippin.

– Sjølv om mykje har blitt betre, tar vi framleis imot tilbakemeldingar med opne armar, seier Hana Colakovic og Michelle Sæther.