Svingande samarbeid

– Vi har drømt om eit samarbeid, og no greip vi sjansen, seier Karianne Maltun, førstesopran og leiar i Tilslørte bondepiker og Tonje Hernes, altsaksofonist i både Oldtimers Big Band (OTBB) og Veggpryd.

Laurdag 2. november inviterer dei tre musikalske laga til storkonsert under tittelen «Humørswing og heite takter».

– Namet er open for tolking, men det er ingen tvil om at det kjem til å svinga i storsalen, seier Maltun.

Med ringrevar i ryggen

Oldtimers Big Band er ein gjeng rutinerte ringrevar – fleire av dei hadde stålkontroll på synkopane alt då Frank Sinatra var på høgden – men dei er likevel eit ungt storband, med debutkonsert på Lyngheim i juni 2015.

Vokalensemblet Tilslørte bondepiker med dirigent Kristine Bjånes har i år feira sine fem første år med stil.

Det glitrande gode, men beskjedne bandet Veggpryd er kveldens yngste, ettersom dei oppstod til ein bondepikekonsert i 2016.

First we take Oseana

Bondepikene har lenge hatt ein ikkje heilt hemmeleg draum om den store døropnarkonserten som skal ta dei til New York, men er jordnære nok til skjøna at det er langt meir realistisk, og dessutan både miljø- og heimepulikumsvenleg, å ta New York til Oseana.

– Dette blir ein skikkeleg konseptkonsert. Tenk Frank Sinatra, Glenn MiIler, tighte blåsarrekker og ein dæsj glamour, så har du det. Vi håpar publikum òg pyntar seg litt ekstra, seier Hernes og Maltun. Etter konserten treng ingen skunda seg heim, då er det platesnurrar og open bar i Oseana-restauranten, med overhengande fare for dans.

Stiller med spelande trenar og eigen crooner

I Old Timers Big Band har Helge Haukås rolla som «spelande trenar», ifølgje medspelarane. Storbandet er med andre ord i dei aller ypperste, proffe trompethender. OTBB har med seg Jan Haaland på vokal, ein mann med mange talent, no òg på scenen som stilsikker crooner.

I Veggpryd er det flat struktur, god stemning og garantert god groove. Bondepike-dirigent Kristine Bjånes slår fast at begge banda held skyhøgt nivå.

– Bondepikene veit heldigvis godt kor heldige dei er som får syngja med så proffe folk!

Repertoaret for kvelden er ein fin miks av klassisk storbandjazz og nyarrangerte låtar frå nabosjangrar.

Bondepiker i byn

Tilslørte bondepiker er ofte å sjå på scenar både inne og ute i sjølvsydde Felleskjøpet-kjolar, men denne kvelden køyrer dei ein heilt annan stil.

– Vi må jo matcha OTBB. Det passar oss fint, for bondepikene kan det det aldri bli for mykje glamour, glitter og stas. Vi gler oss! seier Maltun. Ho nyttar elles høvet til å rosa det gode samarbeidet med Oseana og restauranten.

– Det er heilt perfekt at når konserten er slutt, er det enno mykje igjen av kvelden! Då er det berre å gå ned trappa til open bar og eigen platesnurrar.