Sverre slo 10 år gamal norsk rekord!

Sverre Lunde Pedersen har i kveld gått sesongens siste skøyteløp, 1500 meter i verdscupavsluttinga i Salt Lake City.

Han gjekk i første par mot allround-meister Patrick Roest. Begge sette ny personleg rekord, og Sverre var raskast.

1.42,39 er ny norsk rekord!

Førre rekord, 1.42,67, blei sett av Håvard Bøkko 6. mars 2009, også det i Salt Lake City. Sverre si førre bestenotering på distansen var 1.43,08 på same bane i november 2015.

Dette er Lunde Pedersen sin andre noregsrekord denne sesongen, den første kom på 5000 meter, 6.07,16, då han vann VM enkeltdistansar i Inzell. I Calgary førre helg persa han på både 500 meter (35,85) og 10.000 meter (12.56,91).

Nuis sette verdsrekord - Sverre landa på 4. plass

Noregsrekorden heldt likevel ikkje til pallplass, for dette var ein dag for fleire rekordar. Sverre landa på 4. plass i tidenes raskaste 1500 meter.

I paret etter kom Kjeld Nuis og sette ny verdsrekord med tida 1.40,17!

Thomas Krol kom på 2. plass, også han med ny personel bestenotering, 1.40,54. Denis Yuskov tok 3. plassen med tida 1.41,49.

– Etter ein tung 5000 meter i går kjente eg at eg var litt seig i kroppen. Då er det gøy å avslutta sesongen på denne måten, seier Sverre til NRK etter løpet.

Allan Dahl Johansson kom på 7. plass med ny pers, 1:42.92. Johansson kom på 4. plass samanlagt, Lunde Pedersen på 12. plass.