Supertrio i Ole Bull sin heim
Arve Tellefsen, Knut Buen og Ole Christian Haagenrud til Lysøen og Ole Bull sin villa med Ole Bull sin musikk.
Sundag kjem to av landets framste felespelarar, Arve Tellefsen og Knut Buen, saman med pianist Ole Christian Haagenrud til Lysøen for å ta publikum med inn i Ole Bull si toneheim.
– Alt ligg til rette for ei magisk stund i Ole Bull sin villa, reklamerar arrangørane.
Arve Tellefsen er, og har vore i ein mannsalder, ein av dei framste fiolinistane i Noreg. Han vitjar Lysøen jamnleg og var òg med under opninga av Oseana kunst- og kultursenter. Tellefsen har spelt med verdskjente orkester og var Noregs første professor i fiolin ved Noregs Musikkhøgskule. Han mottok i 2008 Ole Bull-prisen og er ein av dei mest kjende Bull-formidlarane.
Knut Buen er ein av Noregs framste musikarar på hardingfele og er ein nestor innan folkemusikken. Buen driv utstrakt konsertverksemd, og står bak ei talrekke plateinnspelingar både med eigen musikk og tolkingar av andre sine folkemusikktonar.
Ole Christian Haagenrud blir regna som ein av Noregs mest lovande pianistar og har mellomanna vore solist for Bergens Filharmoniske orkester og Kringkastingsorkesteret. Han er nyleg plukka ut til å delta på årets utgåve av Edvard Griegs Internasjonale Pianokonkurranse.