Sundquist til Sælen Møbler
Treng statistar: I neste veke skal ein spelefilm basert på ei historie av Frode Grytten filmast på Sælen Møbler. Vil du koma på lerretet saman med Bjørn Sundquist?
Delar av Gunnar Vikenes sin nye film, Her er Harold, skal spelast inn i Os, nærmare bestemt hos Sælen Møbler på Søfteland.
– Møbelforretninga passar veldig bra i forhold til historia og ligg praktisk til nær Bergen, seier koordinator i Mer film AS, Kathrine Liisberg Aune til Midtsiden.
– Vi takka naturlegvis ja, dette blir spennande, trur Arild Sælen fra Sælen Møbler.
Han legg til at butikken held open under innspelinga, som varer heile neste veke, bortsett frå om torsdagen, i tillegg skal det vera innspeling måndag i veka etter.
Treng statistar
Filmen, som har Bjørn Sundquist i hovudrolla, er ein fandenivoldsk komedie om den fallerte møbelhandlaren Harold Lunde, som reiser til Sverige for å kidnappa IKEA-gründer Ingvar Kamprad.
Manuset er basert på ei av forteljingane i Frode Grytten si bok, Saganatt (2011).
– Vi treng to statistar til opptaka i Os, og det kan gjerne vera lokale folk, seier Aune.
Selskapet er i hovudsak på jakt etter to vaksne, ei kvinne og ein mann, på mellom 30 og 60 år.
Er du interessert kan du kontakta Aune på epost kittaune@gmail.com.
Ombygging og action
Sælen Møbler er godt førebudd på opptaka.
– Det har vore folk her og sett opp veggar og skifta lysrør. Vi har no fullt dagslys inne i butikken, ler Arild.
Han håper kundane er tålmodige under innspelinga.
– Det skal visst bli ein del action under delar av opptaka, så det blir nokre større omveltningar i butikken, fortel han.