Suksess med buss-cabriolet

I desse dagar kjører Osbuss AS ungdomar frå Os til skidagar i Eikedalen. Men skibussen har blitt eit mindre viktig produkt for Arne Bogevik & Co, som no i vinterferien tenkjer mest på plussgradar og sommarsesong.

- Det var spennande å byrja med sightseeing i Bergen, travelt, men kjekt, spesielt sidan tilbodet blei så attraktivt, seier Osbuss-eigaren.

I fjor etablerte Osbuss AS eit dotterfirma for å kjøra turistrute i Bergen. City Sightseeing Bergen AS fekk konsesjon på ei spennande rute som gjekk 9 gongar per dag, 7 dagar i veka, frå mai til ut august.

- Vi hadde også turar utover dei annonserte rutene, den siste turen gjekk 17. oktober, seier trafikkleiar Kenneth Valle, som nok ein gong har vore til Barcelona for å kjøpa den litt spesielle buss-typen.

Buss utan tak

Bussen som blir brukt til å ta turistane rundt i Bergen er ein Iveco Mago 2 Cabrio. Cabrioletbussen har 34 sete, tak og ruter rundt førarposisjonen, men resten er utan veggar og ruter.

- Vi har kalesje som kan brukast som tak over passasjerane, men bussen har ikkje sideruter, så det blir som å vera utandørs. Det som er morosamt er at turistane koser seg også om det regnar, å bli våt blir som ein del av opplevinga.

Bussen går frå Skolten ein gong i timen, og stoppar på rundt 30 kjente plassar og attraksjonar i Bergen. Turistane kjøper dagskort (150 kroner) og kan då gå av og på som dei vil, On&Off-seightseeing, som det blir kalla.

GPS-styrt guide

I tillegg til tranportfunksjonen har bussane opptak med innleste lydspor om bord, informasjon om Bergen og plassane bussen kjører forbi, lest inn på åtte ulike språk.

- Vi har fleire samarbeidspartnarar i turistbransjen og fekk hjelp av Bergen Guide Service til å laga manus som seinare blei lest inn i studio.

- Avspelaren er styrt av GPS, slik at informasjonen kjem automatisk og til rett tid.

12 turar per dag

Arne og Kenneth fortel at seightseeing-prosjektet har vore ein lærerik prosess og at dei no ser fram til ein ny, travel sesong i Bergen.

- Cabrioletbuss nummer to kjem til Noreg no i vår og skal registrerast 16. mai. Så blir det rett i teneste.

Med utvida kapasitet blir det fleire avgangar, selskapet aukar frå 9 til 12.

- Vi kjem nok til å starta sesongen endå tidlegare i år, i april, og kjører eit stykke utover hausten. I tillegg har den første cabrioletbussen vore på nokre andre oppdrag, for firma, til bryllaup og til filminnspeling, seier Kenneth, og røper at Varg Veum skal fraktast til Fløyen i ein Mago 2 Cabrio i neste film.

Attraktiv og veksande arbeidsplass

Arne Bogevik hadde kjørt buss i 17 år då han i 1995 starta Os Minibuss Service. Året etter dobla han frå éin buss og seg sjølv som einaste tilsette til to bussar og to mann.

- Vi fekk ein ganske god start, med fleire faste kundar, som Solstrand Hotel og Bad, og skulerute i Hegglandsdalen, fortel han.

I 2006 blei det aksjeselskap og namnebyte til Osbuss, i 2008 kjøpte dei opp Centrum Bilutleige og deira fire bilar og eine limousine.

I dag har Osbuss AS og dotterselskapet Bergen City Sightseeing AS til saman 26 tilsette i 18 årsverk.

- Vi har vore heldige med dei tilsette og fått ein stabil stall av flinke folk som ser ut til å lika seg i jobben.

Ved sida av guideprosjektet kjører dei tre faste ruter i Bergen sentrum og fleire skuleruter.

- Men oppdrag frå firma og private utgjer framleis mest, over 50 prosent av omsetnaden kjem frå turar for bedrifter, kursdeltakarar, turistar og grupper med privatpersonar, fortel Arne Bogevik.