– Stupid woman!
Svindlarane som seier dei er frå "Microsoft" gjev ikkje opp så lett.
Fleire gongar i februar og mars har Midtsiden fått meldingar om osingar som får telefon frå utlandet, der oppringar snakkar gebrokkent engelsk, og seier at dei han ringer til har problem med pc-en, men at han er frå Microsoft og kan hjelpa.
I midten av mars beit ein av osingane på, logga seg på ei side online og lét vedkomande fjernstyra pc-en.
Offeret heldt til og med førarkortet sitt fram for avfotografering på webkamera.
Sidan den gong har Midtsiden fått melding om yttarlegare tre slike tilfelle, det siste i dag.
Då var det ei kvinne frå Os, som sjølv jobbar som systemansvarleg, som tok telefonen.
– Eg forklarte han at pc-en min var heilt fin og at eg veit kva eg snakkar om. Då blei han irritert og sa eg måtte sjekka ut nettsida hans. Han blei rett og slett forbanna til slutt, og kalte meg "stupid woman", fortel kvinna.
Ho meiner det er på sin plass å gjenta åtvaringa om å ta imot pc-assistanse per telefon.
– No fekk eg sjølv erfara kor aggressive desse folka kan vera, det er berre til å legga på røret med ein gong.